Rig Veda · Chapter 10.131

apa prāca indra viśvām̐ amitrān apāpāco abhibhūte nudasva |
apodīco apa śūrādharāca urau yathā tava śarman madema ||

kuvid aṅga yavamanto yavaṁ cid yathā dānty anupūrvaṁ viyūya |
ihehaiṣāṁ kṛṇuhi bhojanāni ye barhiṣo namovṛktiṁ na jagmuḥ ||

nahi sthūry ṛtuthā yātam asti nota śravo vivide saṁgameṣu |
gavyanta indraṁ sakhyāya viprā aśvāyanto vṛṣaṇaṁ vājayantaḥ ||

yuvaṁ surāmam aśvinā namucāv āsure sacā |
vipipānā śubhas patī indraṁ karmasv āvatam ||

putram iva pitarāv aśvinobhendrāvathuḥ kāvyair daṁsanābhiḥ |
yat surāmaṁ vy apibaḥ śacībhiḥ sarasvatī tvā maghavann abhiṣṇak ||

indraḥ sutrāmā svavām̐ avobhiḥ sumṛḻīko bhavatu viśvavedāḥ |
bādhatāṁ dveṣo abhayaṁ kṛṇotu suvīryasya patayaḥ syāma ||

tasya vayaṁ sumatau yajñiyasyāpi bhadre saumanase syāma |
sa sutrāmā svavām̐ indro asme ārāc cid dveṣaḥ sanutar yuyotu ||