Rig Veda · Chapter 10.130

yo yajño viśvatas tantubhis tata ekaśataṁ devakarmebhir āyataḥ |
ime vayanti pitaro ya āyayuḥ pra vayāpa vayety āsate tate ||

pumām̐ enaṁ tanuta ut kṛṇatti pumān vi tatne adhi nāke asmin |
ime mayūkhā upa sedur ū sadaḥ sāmāni cakrus tasarāṇy otave ||

kāsīt pramā pratimā kiṁ nidānam ājyaṁ kim āsīt paridhiḥ ka āsīt |
chandaḥ kim āsīt praügaṁ kim ukthaṁ yad devā devam ayajanta viśve ||

agner gāyatry abhavat sayugvoṣṇihayā savitā sam babhūva |
anuṣṭubhā soma ukthair mahasvān bṛhaspater bṛhatī vācam āvat ||

virāṇ mitrāvaruṇayor abhiśrīr indrasya triṣṭub iha bhāgo ahnaḥ |
viśvān devāñ jagaty ā viveśa tena cākḷpra ṛṣayo manuṣyāḥ ||

cākḷpre tena ṛṣayo manuṣyā yajñe jāte pitaro naḥ purāṇe |
paśyan manye manasā cakṣasā tān ya imaṁ yajñam ayajanta pūrve ||

sahastomāḥ sahachandasa āvṛtaḥ sahapramā ṛṣayaḥ sapta daivyāḥ |
pūrveṣām panthām anudṛśya dhīrā anvālebhire rathyo3 na raśmīn ||