Rig Veda · Chapter 10.124

imaṁ no agna upa yajñam ehi pañcayāmaṁ trivṛtaṁ saptatantum |
aso havyavāḻ uta naḥ purogā jyog eva dīrghaṁ tama āśayiṣṭhāḥ ||

adevād devaḥ pracatā guhā yan prapaśyamāno amṛtatvam emi |
śivaṁ yat santam aśivo jahāmi svāt sakhyād araṇīṁ nābhim emi ||

paśyann anyasyā atithiṁ vayāyā ṛtasya dhāma vi mime purūṇi |
śaṁsāmi pitre asurāya śevam ayajñiyād yajñiyam bhāgam emi ||

bahvīḥ samā akaram antar asminn indraṁ vṛṇānaḥ pitaraṁ jahāmi |
agniḥ somo varuṇas te cyavante paryāvard rāṣṭraṁ tad avāmy āyan ||

nirmāyā u tye asurā abhūvan tvaṁ ca mā varuṇa kāmayāse |
ṛtena rājann anṛtaṁ viviñcan mama rāṣṭrasyādhipatyam ehi ||

idaṁ svar idam id āsa vāmam ayam prakāśa urv a1ntarikṣam |
hanāva vṛtraṁ nirehi soma haviṣ ṭvā santaṁ haviṣā yajāma ||

kaviḥ kavitvā divi rūpam āsajad aprabhūtī varuṇo nir apaḥ sṛjat |
kṣemaṁ kṛṇvānā janayo na sindhavas tā asya varṇaṁ śucayo bharibhrati ||

tā asya jyeṣṭham indriyaṁ sacante tā īm ā kṣeti svadhayā madantīḥ |
tā īṁ viśo na rājānaṁ vṛṇānā bībhatsuvo apa vṛtrād atiṣṭhan ||

bībhatsūnāṁ sayujaṁ haṁsam āhur apāṁ divyānāṁ sakhye carantam |
anuṣṭubham anu carcūryamāṇam indraṁ ni cikyuḥ kavayo manīṣā ||