Rig Veda · Chapter 10.112

indra piba pratikāmaṁ sutasya prātaḥsāvas tava hi pūrvapītiḥ |
harṣasva hantave śūra śatrūn ukthebhiṣ ṭe vīryā3 pra bravāma ||

yas te ratho manaso javīyān endra tena somapeyāya yāhi |
tūyam ā te harayaḥ pra dravantu yebhir yāsi vṛṣabhir mandamānaḥ ||

haritvatā varcasā sūryasya śreṣṭhai rūpais tanvaṁ sparśayasva |
asmābhir indra sakhibhir huvānaḥ sadhrīcīno mādayasvā niṣadya ||

yasya tyat te mahimānam madeṣv ime mahī rodasī nāviviktām |
tad oka ā haribhir indra yuktaiḥ priyebhir yāhi priyam annam accha ||

yasya śaśvat papivām̐ indra śatrūn anānukṛtyā raṇyā cakartha |
sa te puraṁdhiṁ taviṣīm iyarti sa te madāya suta indra somaḥ ||

idaṁ te pātraṁ sanavittam indra pibā somam enā śatakrato |
pūrṇa āhāvo madirasya madhvo yaṁ viśva id abhiharyanti devāḥ ||

vi hi tvām indra purudhā janāso hitaprayaso vṛṣabha hvayante |
asmākaṁ te madhumattamānīmā bhuvan savanā teṣu harya ||

pra ta indra pūrvyāṇi pra nūnaṁ vīryā vocam prathamā kṛtāni |
satīnamanyur aśrathāyo adriṁ suvedanām akṛṇor brahmaṇe gām ||

ni ṣu sīda gaṇapate gaṇeṣu tvām āhur vipratamaṁ kavīnām |
na ṛte tvat kriyate kiṁ canāre mahām arkam maghavañ citram arca ||

abhikhyā no maghavan nādhamānān sakhe bodhi vasupate sakhīnām |
raṇaṁ kṛdhi raṇakṛt satyaśuṣmābhakte cid ā bhajā rāye asmān ||