Rig Veda · Chapter 10.110

samiddho adya manuṣo duroṇe devo devān yajasi jātavedaḥ |
ā ca vaha mitramahaś cikitvān tvaṁ dūtaḥ kavir asi pracetāḥ ||

tanūnapāt patha ṛtasya yānān madhvā samañjan svadayā sujihva |
manmāni dhībhir uta yajñam ṛndhan devatrā ca kṛṇuhy adhvaraṁ naḥ ||

ājuhvāna īḍyo vandyaś cā yāhy agne vasubhiḥ sajoṣāḥ |
tvaṁ devānām asi yahva hotā sa enān yakṣīṣito yajīyān ||

prācīnam barhiḥ pradiśā pṛthivyā vastor asyā vṛjyate agre ahnām |
vy u prathate vitaraṁ varīyo devebhyo aditaye syonam ||

vyacasvatīr urviyā vi śrayantām patibhyo na janayaḥ śumbhamānāḥ |
devīr dvāro bṛhatīr viśvaminvā devebhyo bhavata suprāyaṇāḥ ||

ā suṣvayantī yajate upāke uṣāsānaktā sadatāṁ ni yonau |
divye yoṣaṇe bṛhatī surukme adhi śriyaṁ śukrapiśaṁ dadhāne ||

daivyā hotārā prathamā suvācā mimānā yajñam manuṣo yajadhyai |
pracodayantā vidatheṣu kārū prācīnaṁ jyotiḥ pradiśā diśantā ||

ā no yajñam bhāratī tūyam etv iḻā manuṣvad iha cetayantī |
tisro devīr barhir edaṁ syonaṁ sarasvatī svapasaḥ sadantu ||

ya ime dyāvāpṛthivī janitrī rūpair apiṁśad bhuvanāni viśvā |
tam adya hotar iṣito yajīyān devaṁ tvaṣṭāram iha yakṣi vidvān ||

upāvasṛja tmanyā samañjan devānām pātha ṛtuthā havīṁṣi |
vanaspatiḥ śamitā devo agniḥ svadantu havyam madhunā ghṛtena ||

sadyo jāto vy amimīta yajñam agnir devānām abhavat purogāḥ |
asya hotuḥ pradiśy ṛtasya vāci svāhākṛtaṁ havir adantu devāḥ ||