Rig Veda · Chapter 10.107

āvir abhūn mahi māghonam eṣāṁ viśvaṁ jīvaṁ tamaso nir amoci |
mahi jyotiḥ pitṛbhir dattam āgād uruḥ panthā dakṣiṇāyā adarśi ||

uccā divi dakṣiṇāvanto asthur ye aśvadāḥ saha te sūryeṇa |
hiraṇyadā amṛtatvam bhajante vāsodāḥ soma pra tiranta āyuḥ ||

daivī pūrtir dakṣiṇā devayajyā na kavāribhyo nahi te pṛṇanti |
athā naraḥ prayatadakṣiṇāso 'vadyabhiyā bahavaḥ pṛṇanti ||

śatadhāraṁ vāyum arkaṁ svarvidaṁ nṛcakṣasas te abhi cakṣate haviḥ |
ye pṛṇanti pra ca yacchanti saṁgame te dakṣiṇāṁ duhate saptamātaram ||

dakṣiṇāvān prathamo hūta eti dakṣiṇāvān grāmaṇīr agram eti |
tam eva manye nṛpatiṁ janānāṁ yaḥ prathamo dakṣiṇām āvivāya ||

tam eva ṛṣiṁ tam u brahmāṇam āhur yajñanyaṁ sāmagām ukthaśāsam |
sa śukrasya tanvo veda tisro yaḥ prathamo dakṣiṇayā rarādha ||

dakṣiṇāśvaṁ dakṣiṇā gāṁ dadāti dakṣiṇā candram uta yad dhiraṇyam |
dakṣiṇānnaṁ vanute yo na ātmā dakṣiṇāṁ varma kṛṇute vijānan ||

na bhojā mamrur na nyartham īyur na riṣyanti na vyathante ha bhojāḥ |
idaṁ yad viśvam bhuvanaṁ svaś caitat sarvaṁ dakṣiṇaibhyo dadāti ||

bhojā jigyuḥ surabhiṁ yonim agre bhojā jigyur vadhva1ṁ yā suvāsāḥ |
bhojā jigyur antaḥpeyaṁ surāyā bhojā jigyur ye ahūtāḥ prayanti ||

bhojāyāśvaṁ sam mṛjanty āśum bhojāyāste kanyā3 śumbhamānā |
bhojasyedam puṣkariṇīva veśma pariṣkṛtaṁ devamāneva citram ||

bhojam aśvāḥ suṣṭhuvāho vahanti suvṛd ratho vartate dakṣiṇāyāḥ |
bhojaṁ devāso 'vatā bhareṣu bhojaḥ śatrūn samanīkeṣu jetā ||