Rig Veda · Chapter 10.106

ubhā u nūnaṁ tad id arthayethe vi tanvāthe dhiyo vastrāpaseva |
sadhrīcīnā yātave prem ajīgaḥ sudineva pṛkṣa ā taṁsayethe ||

uṣṭāreva pharvareṣu śrayethe prāyogeva śvātryā śāsur ethaḥ |
dūteva hi ṣṭho yaśasā janeṣu māpa sthātam mahiṣevāvapānāt ||

sākaṁyujā śakunasyeva pakṣā paśveva citrā yajur ā gamiṣṭam |
agnir iva devayor dīdivāṁsā parijmāneva yajathaḥ purutrā ||

āpī vo asme pitareva putrogreva rucā nṛpatīva turyai |
iryeva puṣṭyai kiraṇeva bhujyai śruṣṭīvāneva havam ā gamiṣṭam ||

vaṁsageva pūṣaryā śimbātā mitreva ṛtā śatarā śātapantā |
vājevoccā vayasā gharmyeṣṭhā meṣeveṣā saparyā3 purīṣā ||

sṛṇyeva jarbharī turpharītū naitośeva turpharī parpharīkā |
udanyajeva jemanā maderū tā me jarāyv ajaram marāyu ||

pajreva carcaraṁ jāram marāyu kṣadmevārtheṣu tartarītha ugrā |
ṛbhū nāpat kharamajrā kharajrur vāyur na parpharat kṣayad rayīṇām ||

gharmeva madhu jaṭhare sanerū bhagevitā turpharī phārivāram |
patareva cacarā candranirṇiṅ manaṛṅgā mananyā3 na jagmī ||

bṛhanteva gambhareṣu pratiṣṭhām pādeva gādhaṁ tarate vidāthaḥ |
karṇeva śāsur anu hi smarātho 'ṁśeva no bhajataṁ citram apnaḥ ||

āraṅgareva madhv erayethe sāragheva gavi nīcīnabāre |
kīnāreva svedam āsiṣvidānā kṣāmevorjā sūyavasāt sacethe ||

ṛdhyāma stomaṁ sanuyāma vājam ā no mantraṁ sarathehopa yātam |
yaśo na pakvam madhu goṣv antar ā bhūtāṁśo aśvinoḥ kāmam aprāḥ ||