ઋગ્વેદ · અધ્યાય 10.106

ઉભા ઉ નૂનં તદ્ ઇદ્ અર્થયેથે વિ તન્વાથે ધિયો વસ્ત્રાપસેવ ।
સધ્રીચીના યાતવે પ્રેમ્ અજીગઃ સુદિનેવ પૃક્ષ આ તંસયેથે ॥

ઉષ્ટારેવ ફર્વરેષુ શ્રયેથે પ્રાયોગેવ શ્વાત્ર્યા શાસુર્ એથઃ ।
દૂતેવ હિ ષ્ઠો યશસા જનેષુ માપ સ્થાતમ્ મહિષેવાવપાનાત્ ॥

સાકંયુજા શકુનસ્યેવ પક્ષા પશ્વેવ ચિત્રા યજુર્ આ ગમિષ્ટમ્ ।
અગ્નિર્ ઇવ દેવયોર્ દીદિવાંસા પરિજ્માનેવ યજથઃ પુરુત્રા ॥

આપી વો અસ્મે પિતરેવ પુત્રોગ્રેવ રુચા નૃપતીવ તુર્યૈ ।
ઇર્યેવ પુષ્ટ્યૈ કિરણેવ ભુજ્યૈ શ્રુષ્ટીવાનેવ હવમ્ આ ગમિષ્ટમ્ ॥

વંસગેવ પૂષર્યા શિમ્બાતા મિત્રેવ ઋતા શતરા શાતપન્તા ।
વાજેવોચ્ચા વયસા ઘર્મ્યેષ્ઠા મેષેવેષા સપર્યા3 પુરીષા ॥

સૃણ્યેવ જર્ભરી તુર્ફરીતૂ નૈતોશેવ તુર્ફરી પર્ફરીકા ।
ઉદન્યજેવ જેમના મદેરૂ તા મે જરાય્વ્ અજરમ્ મરાયુ ॥

પજ્રેવ ચર્ચરં જારમ્ મરાયુ ક્ષદ્મેવાર્થેષુ તર્તરીથ ઉગ્રા ।
ઋભૂ નાપત્ ખરમજ્રા ખરજ્રુર્ વાયુર્ ન પર્ફરત્ ક્ષયદ્ રયીણામ્ ॥

ઘર્મેવ મધુ જઠરે સનેરૂ ભગેવિતા તુર્ફરી ફારિવારમ્ ।
પતરેવ ચચરા ચન્દ્રનિર્ણિઙ્ મનઋઙ્ગા મનન્યા3 ન જગ્મી ॥

બૃહન્તેવ ગમ્ભરેષુ પ્રતિષ્ઠામ્ પાદેવ ગાધં તરતે વિદાથઃ ।
કર્ણેવ શાસુર્ અનુ હિ સ્મરાથો ઽંશેવ નો ભજતં ચિત્રમ્ અપ્નઃ ॥

આરઙ્ગરેવ મધ્વ્ એરયેથે સારઘેવ ગવિ નીચીનબારે ।
કીનારેવ સ્વેદમ્ આસિષ્વિદાના ક્ષામેવોર્જા સૂયવસાત્ સચેથે ॥

ઋધ્યામ સ્તોમં સનુયામ વાજમ્ આ નો મન્ત્રં સરથેહોપ યાતમ્ ।
યશો ન પક્વમ્ મધુ ગોષ્વ્ અન્તર્ આ ભૂતાંશો અશ્વિનોઃ કામમ્ અપ્રાઃ ॥