Rig Veda · Chapter 10.086

vi hi sotor asṛkṣata nendraṁ devam amaṁsata |
yatrāmadad vṛṣākapir aryaḥ puṣṭeṣu matsakhā viśvasmād indra uttaraḥ ||

parā hīndra dhāvasi vṛṣākaper ati vyathiḥ |
no aha pra vindasy anyatra somapītaye viśvasmād indra uttaraḥ ||

kim ayaṁ tvāṁ vṛṣākapiś cakāra harito mṛgaḥ |
yasmā irasyasīd u nv a1ryo vā puṣṭimad vasu viśvasmād indra uttaraḥ ||

yam imaṁ tvaṁ vṛṣākapim priyam indrābhirakṣasi |
śvā nv asya jambhiṣad api karṇe varāhayur viśvasmād indra uttaraḥ ||

priyā taṣṭāni me kapir vyaktā vy adūduṣat |
śiro nv asya rāviṣaṁ na sugaṁ duṣkṛte bhuvaṁ viśvasmād indra uttaraḥ ||

na mat strī subhasattarā na suyāśutarā bhuvat |
na mat praticyavīyasī na sakthy udyamīyasī viśvasmād indra uttaraḥ ||

uve amba sulābhike yathevāṅga bhaviṣyati |
bhasan me amba sakthi me śiro me vīva hṛṣyati viśvasmād indra uttaraḥ ||

kiṁ subāho svaṅgure pṛthuṣṭo pṛthujāghane |
kiṁ śūrapatni nas tvam abhy amīṣi vṛṣākapiṁ viśvasmād indra uttaraḥ ||

avīrām iva mām ayaṁ śarārur abhi manyate |
utāham asmi vīriṇīndrapatnī marutsakhā viśvasmād indra uttaraḥ ||

saṁhotraṁ sma purā nārī samanaṁ vāva gacchati |
vedhā ṛtasya vīriṇīndrapatnī mahīyate viśvasmād indra uttaraḥ ||

indrāṇīm āsu nāriṣu subhagām aham aśravam |
nahy asyā aparaṁ cana jarasā marate patir viśvasmād indra uttaraḥ ||

nāham indrāṇi rāraṇa sakhyur vṛṣākaper ṛte |
yasyedam apyaṁ haviḥ priyaṁ deveṣu gacchati viśvasmād indra uttaraḥ ||

vṛṣākapāyi revati suputra ād u susnuṣe |
ghasat ta indra ukṣaṇaḥ priyaṁ kācitkaraṁ havir viśvasmād indra uttaraḥ ||

ukṣṇo hi me pañcadaśa sākam pacanti viṁśatim |
utāham admi pīva id ubhā kukṣī pṛṇanti me viśvasmād indra uttaraḥ ||

vṛṣabho na tigmaśṛṅgo 'ntar yūtheṣu roruvat |
manthas ta indra śaṁ hṛde yaṁ te sunoti bhāvayur viśvasmād indra uttaraḥ ||

na seśe yasya rambate 'ntarā sakthyā3 kapṛt |
sed īśe yasya romaśaṁ niṣeduṣo vijṛmbhate viśvasmād indra uttaraḥ ||

na seśe yasya romaśaṁ niṣeduṣo vijṛmbhate |
sed īśe yasya rambate 'ntarā sakthyā3 kapṛd viśvasmād indra uttaraḥ ||

ayam indra vṛṣākapiḥ parasvantaṁ hataṁ vidat |
asiṁ sūnāṁ navaṁ carum ād edhasyāna ācitaṁ viśvasmād indra uttaraḥ ||

ayam emi vicākaśad vicinvan dāsam āryam |
pibāmi pākasutvano 'bhi dhīram acākaśaṁ viśvasmād indra uttaraḥ ||

dhanva ca yat kṛntatraṁ ca kati svit tā vi yojanā |
nedīyaso vṛṣākape 'stam ehi gṛhām̐ upa viśvasmād indra uttaraḥ ||

punar ehi vṛṣākape suvitā kalpayāvahai |
ya eṣa svapnanaṁśano 'stam eṣi pathā punar viśvasmād indra uttaraḥ ||

yad udañco vṛṣākape gṛham indrājagantana |
kva1 sya pulvagho mṛgaḥ kam agañ janayopano viśvasmād indra uttaraḥ ||

parśur ha nāma mānavī sākaṁ sasūva viṁśatim |
bhadram bhala tyasyā abhūd yasyā udaram āmayad viśvasmād indra uttaraḥ ||