Rig Veda · Chapter 10.084

tvayā manyo saratham ārujanto harṣamāṇāso dhṛṣitā marutvaḥ |
tigmeṣava āyudhā saṁśiśānā abhi pra yantu naro agnirūpāḥ ||

agnir iva manyo tviṣitaḥ sahasva senānīr naḥ sahure hūta edhi |
hatvāya śatrūn vi bhajasva veda ojo mimāno vi mṛdho nudasva ||

sahasva manyo abhimātim asme rujan mṛṇan pramṛṇan prehi śatrūn |
ugraṁ te pājo nanv ā rurudhre vaśī vaśaṁ nayasa ekaja tvam ||

eko bahūnām asi manyav īḻito viśaṁ-viśaṁ yudhaye saṁ śiśādhi |
akṛttaruk tvayā yujā vayaṁ dyumantaṁ ghoṣaṁ vijayāya kṛṇmahe ||

vijeṣakṛd indra ivānavabravo3 'smākam manyo adhipā bhaveha |
priyaṁ te nāma sahure gṛṇīmasi vidmā tam utsaṁ yata ābabhūtha ||

ābhūtyā sahajā vajra sāyaka saho bibharṣy abhibhūta uttaram |
kratvā no manyo saha medy edhi mahādhanasya puruhūta saṁsṛji ||

saṁsṛṣṭaṁ dhanam ubhayaṁ samākṛtam asmabhyaṁ dattāṁ varuṇaś ca manyuḥ |
bhiyaṁ dadhānā hṛdayeṣu śatravaḥ parājitāso apa ni layantām ||