Rig Veda · Chapter 10.071

bṛhaspate prathamaṁ vāco agraṁ yat prairata nāmadheyaṁ dadhānāḥ |
yad eṣāṁ śreṣṭhaṁ yad aripram āsīt preṇā tad eṣāṁ nihitaṁ guhāviḥ ||

saktum iva titaünā punanto yatra dhīrā manasā vācam akrata |
atrā sakhāyaḥ sakhyāni jānate bhadraiṣāṁ lakṣmīr nihitādhi vāci ||

yajñena vācaḥ padavīyam āyan tām anv avindann ṛṣiṣu praviṣṭām |
tām ābhṛtyā vy adadhuḥ purutrā tāṁ sapta rebhā abhi saṁ navante ||

uta tvaḥ paśyan na dadarśa vācam uta tvaḥ śṛṇvan na śṛṇoty enām |
uto tvasmai tanva1ṁ vi sasre jāyeva patya uśatī suvāsāḥ ||

uta tvaṁ sakhye sthirapītam āhur nainaṁ hinvanty api vājineṣu |
adhenvā carati māyayaiṣa vācaṁ śuśruvām̐ aphalām apuṣpām ||

yas tityāja sacividaṁ sakhāyaṁ na tasya vācy api bhāgo asti |
yad īṁ śṛṇoty alakaṁ śṛṇoti nahi praveda sukṛtasya panthām ||

akṣaṇvantaḥ karṇavantaḥ sakhāyo manojaveṣv asamā babhūvuḥ |
ādaghnāsa upakakṣāsa u tve hradā iva snātvā u tve dadṛśre ||

hṛdā taṣṭeṣu manaso javeṣu yad brāhmaṇāḥ saṁyajante sakhāyaḥ |
atrāha tvaṁ vi jahur vedyābhir ohabrahmāṇo vi caranty u tve ||

ime ye nārvāṅ na paraś caranti na brāhmaṇāso na sutekarāsaḥ |
ta ete vācam abhipadya pāpayā sirīs tantraṁ tanvate aprajajñayaḥ ||

sarve nandanti yaśasāgatena sabhāsāhena sakhyā sakhāyaḥ |
kilbiṣaspṛt pituṣaṇir hy eṣām araṁ hito bhavati vājināya ||

ṛcāṁ tvaḥ poṣam āste pupuṣvān gāyatraṁ tvo gāyati śakvarīṣu |
brahmā tvo vadati jātavidyāṁ yajñasya mātrāṁ vi mimīta u tvaḥ ||