Rig Veda · Chapter 10.070

imām me agne samidhaṁ juṣasveḻas pade prati haryā ghṛtācīm |
varṣman pṛthivyāḥ sudinatve ahnām ūrdhvo bhava sukrato devayajyā ||

ā devānām agrayāveha yātu narāśaṁso viśvarūpebhir aśvaiḥ |
ṛtasya pathā namasā miyedho devebhyo devatamaḥ suṣūdat ||

śaśvattamam īḻate dūtyāya haviṣmanto manuṣyāso agnim |
vahiṣṭhair aśvaiḥ suvṛtā rathenā devān vakṣi ni ṣadeha hotā ||

vi prathatāṁ devajuṣṭaṁ tiraścā dīrghaṁ drāghmā surabhi bhūtv asme |
aheḻatā manasā deva barhir indrajyeṣṭhām̐ uśato yakṣi devān ||

divo vā sānu spṛśatā varīyaḥ pṛthivyā vā mātrayā vi śrayadhvam |
uśatīr dvāro mahinā mahadbhir devaṁ rathaṁ rathayur dhārayadhvam ||

devī divo duhitarā suśilpe uṣāsānaktā sadatāṁ ni yonau |
ā vāṁ devāsa uśatī uśanta urau sīdantu subhage upasthe ||

ūrdhvo grāvā bṛhad agniḥ samiddhaḥ priyā dhāmāny aditer upasthe |
purohitāv ṛtvijā yajñe asmin viduṣṭarā draviṇam ā yajethām ||

tisro devīr barhir idaṁ varīya ā sīdata cakṛmā vaḥ syonam |
manuṣvad yajñaṁ sudhitā havīṁṣīḻā devī ghṛtapadī juṣanta ||

deva tvaṣṭar yad dha cārutvam ānaḍ yad aṅgirasām abhavaḥ sacābhūḥ |
sa devānām pātha upa pra vidvām̐ uśan yakṣi draviṇodaḥ suratnaḥ ||

vanaspate raśanayā niyūyā devānām pātha upa vakṣi vidvān |
svadāti devaḥ kṛṇavad dhavīṁṣy avatāṁ dyāvāpṛthivī havam me ||

āgne vaha varuṇam iṣṭaye na indraṁ divo maruto antarikṣāt |
sīdantu barhir viśva ā yajatrāḥ svāhā devā amṛtā mādayantām ||