Rig Veda · Chapter 10.053

yam aicchāma manasā so3 'yam āgād yajñasya vidvān paruṣaś cikitvān |
sa no yakṣad devatātā yajīyān ni hi ṣatsad antaraḥ pūrvo asmat ||

arādhi hotā niṣadā yajīyān abhi prayāṁsi sudhitāni hi khyat |
yajāmahai yajñiyān hanta devām̐ īḻāmahā īḍyām̐ ājyena ||

sādhvīm akar devavītiṁ no adya yajñasya jihvām avidāma guhyām |
sa āyur āgāt surabhir vasāno bhadrām akar devahūtiṁ no adya ||

tad adya vācaḥ prathamam masīya yenāsurām̐ abhi devā asāma |
ūrjāda uta yajñiyāsaḥ pañca janā mama hotraṁ juṣadhvam ||

pañca janā mama hotraṁ juṣantāṁ gojātā uta ye yajñiyāsaḥ |
pṛthivī naḥ pārthivāt pātv aṁhaso 'ntarikṣaṁ divyāt pātv asmān ||

tantuṁ tanvan rajaso bhānum anv ihi jyotiṣmataḥ patho rakṣa dhiyā kṛtān |
anulbaṇaṁ vayata joguvām apo manur bhava janayā daivyaṁ janam ||

akṣānaho nahyatanota somyā iṣkṛṇudhvaṁ raśanā ota piṁśata |
aṣṭāvandhuraṁ vahatābhito rathaṁ yena devāso anayann abhi priyam ||

aśmanvatī rīyate saṁ rabhadhvam ut tiṣṭhata pra taratā sakhāyaḥ |
atrā jahāma ye asann aśevāḥ śivān vayam ut taremābhi vājān ||

tvaṣṭā māyā ved apasām apastamo bibhrat pātrā devapānāni śaṁtamā |
śiśīte nūnam paraśuṁ svāyasaṁ yena vṛścād etaśo brahmaṇas patiḥ ||

sato nūnaṁ kavayaḥ saṁ śiśīta vāśībhir yābhir amṛtāya takṣatha |
vidvāṁsaḥ padā guhyāni kartana yena devāso amṛtatvam ānaśuḥ ||

garbhe yoṣām adadhur vatsam āsany apīcyena manasota jihvayā |
sa viśvāhā sumanā yogyā abhi siṣāsanir vanate kāra ij jitim ||