ઋગ્વેદ · અધ્યાય 10.034

પ્રાવેપા મા બૃહતો માદયન્તિ પ્રવાતેજા ઇરિણે વર્વૃતાનાઃ ।
સોમસ્યેવ મૌજવતસ્ય ભક્ષો વિભીદકો જાગૃવિર્ મહ્યમ્ અચ્છાન્ ॥

ન મા મિમેથ ન જિહીળ એષા શિવા સખિભ્ય ઉત મહ્યમ્ આસીત્ ।
અક્ષસ્યાહમ્ એકપરસ્ય હેતોર્ અનુવ્રતામ્ અપ જાયામ્ અરોધમ્ ॥

દ્વેષ્ટિ શ્વશ્રૂર્ અપ જાયા રુણદ્ધિ ન નાથિતો વિન્દતે મર્ડિતારમ્ ।
અશ્વસ્યેવ જરતો વસ્ન્યસ્ય નાહં વિન્દામિ કિતવસ્ય ભોગમ્ ॥

અન્યે જાયામ્ પરિ મૃશન્ત્ય્ અસ્ય યસ્યાગૃધદ્ વેદને વાજ્ય્ અ1ક્ષઃ ।
પિતા માતા ભ્રાતર એનમ્ આહુર્ ન જાનીમો નયતા બદ્ધમ્ એતમ્ ॥

યદ્ આદીધ્યે ન દવિષાણ્ય્ એભિઃ પરાયદ્ભ્યો ઽવ હીયે સખિભ્યઃ ।
ન્યુપ્તાશ્ ચ બભ્રવો વાચમ્ અક્રતઁ એમીદ્ એષાં નિષ્કૃતં જારિણીવ ॥

સભામ્ એતિ કિતવઃ પૃચ્છમાનો જેષ્યામીતિ તન્વા3 શૂશુજાનઃ ।
અક્ષાસો અસ્ય વિ તિરન્તિ કામમ્ પ્રતિદીવ્ને દધત આ કૃતાનિ ॥

અક્ષાસ ઇદ્ અઙ્કુશિનો નિતોદિનો નિકૃત્વાનસ્ તપનાસ્ તાપયિષ્ણવઃ ।
કુમારદેષ્ણા જયતઃ પુનર્હણો મધ્વા સમ્પૃક્તાઃ કિતવસ્ય બર્હણા ॥

ત્રિપઞ્ચાશઃ ક્રીળતિ વ્રાત એષાં દેવ ઇવ સવિતા સત્યધર્મા ।
ઉગ્રસ્ય ચિન્ મન્યવે ના નમન્તે રાજા ચિદ્ એભ્યો નમ ઇત્ કૃણોતિ ॥

નીચા વર્તન્ત ઉપરિ સ્ફુરન્ત્ય્ અહસ્તાસો હસ્તવન્તં સહન્તે ।
દિવ્યા અઙ્ગારા ઇરિણે ન્યુપ્તાઃ શીતાઃ સન્તો હૃદયં નિર્ દહન્તિ ॥

જાયા તપ્યતે કિતવસ્ય હીના માતા પુત્રસ્ય ચરતઃ ક્વ સ્વિત્ ।
ઋણાવા બિભ્યદ્ ધનમ્ ઇચ્છમાનો ઽન્યેષામ્ અસ્તમ્ ઉપ નક્તમ્ એતિ ॥

સ્ત્રિયં દૃષ્ટ્વાય કિતવં તતાપાન્યેષાં જાયાં સુકૃતં ચ યોનિમ્ ।
પૂર્વાહ્ણે અશ્વાન્ યુયુજે હિ બભ્રૂન્ સો અગ્નેર્ અન્તે વૃષલઃ પપાદ ॥

યો વઃ સેનાનીર્ મહતો ગણસ્ય રાજા વ્રાતસ્ય પ્રથમો બભૂવ ।
તસ્મૈ કૃણોમિ ન ધના રુણધ્મિ દશાહમ્ પ્રાચીસ્ તદ્ ઋતં વદામિ ॥

અક્ષૈર્ મા દીવ્યઃ કૃષિમ્ ઇત્ કૃષસ્વ વિત્તે રમસ્વ બહુ મન્યમાનઃ ।
તત્ર ગાવઃ કિતવ તત્ર જાયા તન્ મે વિ ચષ્ટે સવિતાયમ્ અર્યઃ ॥

મિત્રં કૃણુધ્વં ખલુ મૃળતા નો મા નો ઘોરેણ ચરતાભિ ધૃષ્ણુ ।
નિ વો નુ મન્યુર્ વિશતામ્ અરાતિર્ અન્યો બભ્રૂણામ્ પ્રસિતૌ ન્વ્ અસ્તુ ॥