Rig Veda · Chapter 10.017

tvaṣṭā duhitre vahatuṁ kṛṇotītīdaṁ viśvam bhuvanaṁ sam eti |
yamasya mātā paryuhyamānā maho jāyā vivasvato nanāśa ||

apāgūhann amṛtām martyebhyaḥ kṛtvī savarṇām adadur vivasvate |
utāśvināv abharad yat tad āsīd ajahād u dvā mithunā saraṇyūḥ ||

pūṣā tvetaś cyāvayatu pra vidvān anaṣṭapaśur bhuvanasya gopāḥ |
sa tvaitebhyaḥ pari dadat pitṛbhyo 'gnir devebhyaḥ suvidatriyebhyaḥ ||

āyur viśvāyuḥ pari pāsati tvā pūṣā tvā pātu prapathe purastāt |
yatrāsate sukṛto yatra te yayus tatra tvā devaḥ savitā dadhātu ||

pūṣemā āśā anu veda sarvāḥ so asmām̐ abhayatamena neṣat |
svastidā āghṛṇiḥ sarvavīro 'prayucchan pura etu prajānan ||

prapathe pathām ajaniṣṭa pūṣā prapathe divaḥ prapathe pṛthivyāḥ |
ubhe abhi priyatame sadhasthe ā ca parā ca carati prajānan ||

sarasvatīṁ devayanto havante sarasvatīm adhvare tāyamāne |
sarasvatīṁ sukṛto ahvayanta sarasvatī dāśuṣe vāryaṁ dāt ||

sarasvati yā sarathaṁ yayātha svadhābhir devi pitṛbhir madantī |
āsadyāsmin barhiṣi mādayasvānamīvā iṣa ā dhehy asme ||

sarasvatīṁ yām pitaro havante dakṣiṇā yajñam abhinakṣamāṇāḥ |
sahasrārgham iḻo atra bhāgaṁ rāyas poṣaṁ yajamāneṣu dhehi ||

āpo asmān mātaraḥ śundhayantu ghṛtena no ghṛtapvaḥ punantu |
viśvaṁ hi ripram pravahanti devīr ud id ābhyaḥ śucir ā pūta emi ||

drapsaś caskanda prathamām̐ anu dyūn imaṁ ca yonim anu yaś ca pūrvaḥ |
samānaṁ yonim anu saṁcarantaṁ drapsaṁ juhomy anu sapta hotrāḥ ||

yas te drapsaḥ skandati yas te aṁśur bāhucyuto dhiṣaṇāyā upasthāt |
adhvaryor vā pari vā yaḥ pavitrāt taṁ te juhomi manasā vaṣaṭkṛtam ||

yas te drapsaḥ skanno yas te aṁśur avaś ca yaḥ paraḥ srucā |
ayaṁ devo bṛhaspatiḥ saṁ taṁ siñcatu rādhase ||

payasvatīr oṣadhayaḥ payasvan māmakaṁ vacaḥ |
apām payasvad it payas tena mā saha śundhata ||