Rig Veda · Chapter 10.016

mainam agne vi daho mābhi śoco māsya tvacaṁ cikṣipo mā śarīram |
yadā śṛtaṁ kṛṇavo jātavedo 'them enam pra hiṇutāt pitṛbhyaḥ ||

śṛtaṁ yadā karasi jātavedo 'them enam pari dattāt pitṛbhyaḥ |
yadā gacchāty asunītim etām athā devānāṁ vaśanīr bhavāti ||

sūryaṁ cakṣur gacchatu vātam ātmā dyāṁ ca gaccha pṛthivīṁ ca dharmaṇā |
apo vā gaccha yadi tatra te hitam oṣadhīṣu prati tiṣṭhā śarīraiḥ ||

ajo bhāgas tapasā taṁ tapasva taṁ te śocis tapatu taṁ te arciḥ |
yās te śivās tanvo jātavedas tābhir vahainaṁ sukṛtām u lokam ||

ava sṛja punar agne pitṛbhyo yas ta āhutaś carati svadhābhiḥ |
āyur vasāna upa vetu śeṣaḥ saṁ gacchatāṁ tanvā jātavedaḥ ||

yat te kṛṣṇaḥ śakuna ātutoda pipīlaḥ sarpa uta vā śvāpadaḥ |
agniṣ ṭad viśvād agadaṁ kṛṇotu somaś ca yo brāhmaṇām̐ āviveśa ||

agner varma pari gobhir vyayasva sam prorṇuṣva pīvasā medasā ca |
net tvā dhṛṣṇur harasā jarhṛṣāṇo dadhṛg vidhakṣyan paryaṅkhayāte ||

imam agne camasam mā vi jihvaraḥ priyo devānām uta somyānām |
eṣa yaś camaso devapānas tasmin devā amṛtā mādayante ||

kravyādam agnim pra hiṇomi dūraṁ yamarājño gacchatu ripravāhaḥ |
ihaivāyam itaro jātavedā devebhyo havyaṁ vahatu prajānan ||

yo agniḥ kravyāt praviveśa vo gṛham imam paśyann itaraṁ jātavedasam |
taṁ harāmi pitṛyajñāya devaṁ sa gharmam invāt parame sadhasthe ||

yo agniḥ kravyavāhanaḥ pitṝn yakṣad ṛtāvṛdhaḥ |
pred u havyāni vocati devebhyaś ca pitṛbhya ā ||

uśantas tvā ni dhīmahy uśantaḥ sam idhīmahi |
uśann uśata ā vaha pitṝn haviṣe attave ||

yaṁ tvam agne samadahas tam u nir vāpayā punaḥ |
kiyāmbv atra rohatu pākadūrvā vyalkaśā ||

śītike śītikāvati hlādike hlādikāvati |
maṇḍūkyā3 su saṁ gama imaṁ sv a1gniṁ harṣaya ||