ઋગ્વેદ · અધ્યાય 10.017

ત્વષ્ટા દુહિત્રે વહતું કૃણોતીતીદં વિશ્વમ્ ભુવનં સમ્ એતિ ।
યમસ્ય માતા પર્યુહ્યમાના મહો જાયા વિવસ્વતો નનાશ ॥

અપાગૂહન્ન્ અમૃતામ્ મર્ત્યેભ્યઃ કૃત્વી સવર્ણામ્ અદદુર્ વિવસ્વતે ।
ઉતાશ્વિનાવ્ અભરદ્ યત્ તદ્ આસીદ્ અજહાદ્ ઉ દ્વા મિથુના સરણ્યૂઃ ॥

પૂષા ત્વેતશ્ ચ્યાવયતુ પ્ર વિદ્વાન્ અનષ્ટપશુર્ ભુવનસ્ય ગોપાઃ ।
સ ત્વૈતેભ્યઃ પરિ દદત્ પિતૃભ્યો ઽગ્નિર્ દેવેભ્યઃ સુવિદત્રિયેભ્યઃ ॥

આયુર્ વિશ્વાયુઃ પરિ પાસતિ ત્વા પૂષા ત્વા પાતુ પ્રપથે પુરસ્તાત્ ।
યત્રાસતે સુકૃતો યત્ર તે યયુસ્ તત્ર ત્વા દેવઃ સવિતા દધાતુ ॥

પૂષેમા આશા અનુ વેદ સર્વાઃ સો અસ્માઁ અભયતમેન નેષત્ ।
સ્વસ્તિદા આઘૃણિઃ સર્વવીરો ઽપ્રયુચ્છન્ પુર એતુ પ્રજાનન્ ॥

પ્રપથે પથામ્ અજનિષ્ટ પૂષા પ્રપથે દિવઃ પ્રપથે પૃથિવ્યાઃ ।
ઉભે અભિ પ્રિયતમે સધસ્થે આ ચ પરા ચ ચરતિ પ્રજાનન્ ॥

સરસ્વતીં દેવયન્તો હવન્તે સરસ્વતીમ્ અધ્વરે તાયમાને ।
સરસ્વતીં સુકૃતો અહ્વયન્ત સરસ્વતી દાશુષે વાર્યં દાત્ ॥

સરસ્વતિ યા સરથં યયાથ સ્વધાભિર્ દેવિ પિતૃભિર્ મદન્તી ।
આસદ્યાસ્મિન્ બર્હિષિ માદયસ્વાનમીવા ઇષ આ ધેહ્ય્ અસ્મે ॥

સરસ્વતીં યામ્ પિતરો હવન્તે દક્ષિણા યજ્ઞમ્ અભિનક્ષમાણાઃ ।
સહસ્રાર્ઘમ્ ઇળો અત્ર ભાગં રાયસ્ પોષં યજમાનેષુ ધેહિ ॥

આપો અસ્માન્ માતરઃ શુન્ધયન્તુ ઘૃતેન નો ઘૃતપ્વઃ પુનન્તુ ।
વિશ્વં હિ રિપ્રમ્ પ્રવહન્તિ દેવીર્ ઉદ્ ઇદ્ આભ્યઃ શુચિર્ આ પૂત એમિ ॥

દ્રપ્સશ્ ચસ્કન્દ પ્રથમાઁ અનુ દ્યૂન્ ઇમં ચ યોનિમ્ અનુ યશ્ ચ પૂર્વઃ ।
સમાનં યોનિમ્ અનુ સંચરન્તં દ્રપ્સં જુહોમ્ય્ અનુ સપ્ત હોત્રાઃ ॥

યસ્ તે દ્રપ્સઃ સ્કન્દતિ યસ્ તે અંશુર્ બાહુચ્યુતો ધિષણાયા ઉપસ્થાત્ ।
અધ્વર્યોર્ વા પરિ વા યઃ પવિત્રાત્ તં તે જુહોમિ મનસા વષટ્કૃતમ્ ॥

યસ્ તે દ્રપ્સઃ સ્કન્નો યસ્ તે અંશુર્ અવશ્ ચ યઃ પરઃ સ્રુચા ।
અયં દેવો બૃહસ્પતિઃ સં તં સિઞ્ચતુ રાધસે ॥

પયસ્વતીર્ ઓષધયઃ પયસ્વન્ મામકં વચઃ ।
અપામ્ પયસ્વદ્ ઇત્ પયસ્ તેન મા સહ શુન્ધત ॥