Rig Veda · Chapter 1.171

prati va enā namasāham emi sūktena bhikṣe sumatiṁ turāṇām |
rarāṇatā maruto vedyābhir ni heḻo dhatta vi mucadhvam aśvān ||

eṣa vaḥ stomo maruto namasvān hṛdā taṣṭo manasā dhāyi devāḥ |
upem ā yāta manasā juṣāṇā yūyaṁ hi ṣṭhā namasa id vṛdhāsaḥ ||

stutāso no maruto mṛḻayantūta stuto maghavā śambhaviṣṭhaḥ |
ūrdhvā naḥ santu komyā vanāny ahāni viśvā maruto jigīṣā ||

asmād ahaṁ taviṣād īṣamāṇa indrād bhiyā maruto rejamānaḥ |
yuṣmabhyaṁ havyā niśitāny āsan tāny āre cakṛmā mṛḻatā naḥ ||

yena mānāsaś citayanta usrā vyuṣṭiṣu śavasā śaśvatīnām |
sa no marudbhir vṛṣabha śravo dhā ugra ugrebhiḥ sthaviraḥ sahodāḥ ||

tvam pāhīndra sahīyaso nṝn bhavā marudbhir avayātaheḻāḥ |
supraketebhiḥ sāsahir dadhāno vidyāmeṣaṁ vṛjanaṁ jīradānum ||