Rig Veda · Chapter 1.163

yad akrandaḥ prathamaṁ jāyamāna udyan samudrād uta vā purīṣāt |
śyenasya pakṣā hariṇasya bāhū upastutyam mahi jātaṁ te arvan ||

yamena dattaṁ trita enam āyunag indra eṇam prathamo adhy atiṣṭhat |
gandharvo asya raśanām agṛbhṇāt sūrād aśvaṁ vasavo nir ataṣṭa ||

asi yamo asy ādityo arvann asi trito guhyena vratena |
asi somena samayā vipṛkta āhus te trīṇi divi bandhanāni ||

trīṇi ta āhur divi bandhanāni trīṇy apsu trīṇy antaḥ samudre |
uteva me varuṇaś chantsy arvan yatrā ta āhuḥ paramaṁ janitram ||

imā te vājinn avamārjanānīmā śaphānāṁ sanitur nidhānā |
atrā te bhadrā raśanā apaśyam ṛtasya yā abhirakṣanti gopāḥ ||

ātmānaṁ te manasārād ajānām avo divā patayantam pataṁgam |
śiro apaśyam pathibhiḥ sugebhir areṇubhir jehamānam patatri ||

atrā te rūpam uttamam apaśyaṁ jigīṣamāṇam iṣa ā pade goḥ |
yadā te marto anu bhogam ānaḻ ād id grasiṣṭha oṣadhīr ajīgaḥ ||

anu tvā ratho anu maryo arvann anu gāvo 'nu bhagaḥ kanīnām |
anu vrātāsas tava sakhyam īyur anu devā mamire vīryaṁ te ||

hiraṇyaśṛṅgo 'yo asya pādā manojavā avara indra āsīt |
devā id asya haviradyam āyan yo arvantam prathamo adhyatiṣṭhat ||

īrmāntāsaḥ silikamadhyamāsaḥ saṁ śūraṇāso divyāso atyāḥ |
haṁsā iva śreṇiśo yatante yad ākṣiṣur divyam ajmam aśvāḥ ||

tava śarīram patayiṣṇv arvan tava cittaṁ vāta iva dhrajīmān |
tava śṛṅgāṇi viṣṭhitā purutrāraṇyeṣu jarbhurāṇā caranti ||

upa prāgāc chasanaṁ vājy arvā devadrīcā manasā dīdhyānaḥ |
ajaḥ puro nīyate nābhir asyānu paścāt kavayo yanti rebhāḥ ||

upa prāgāt paramaṁ yat sadhastham arvām̐ acchā pitaram mātaraṁ ca |
adyā devāñ juṣṭatamo hi gamyā athā śāste dāśuṣe vāryāṇi ||