Rig Veda · Chapter 1.146

trimūrdhānaṁ saptaraśmiṁ gṛṇīṣe 'nūnam agnim pitror upasthe |
niṣattam asya carato dhruvasya viśvā divo rocanāpaprivāṁsam ||

ukṣā mahām̐ abhi vavakṣa ene ajaras tasthāv itaūtir ṛṣvaḥ |
urvyāḥ pado ni dadhāti sānau rihanty ūdho aruṣāso asya ||

samānaṁ vatsam abhi saṁcarantī viṣvag dhenū vi carataḥ sumeke |
anapavṛjyām̐ adhvano mimāne viśvān ketām̐ adhi maho dadhāne ||

dhīrāsaḥ padaṁ kavayo nayanti nānā hṛdā rakṣamāṇā ajuryam |
siṣāsantaḥ pary apaśyanta sindhum āvir ebhyo abhavat sūryo nṝn ||

didṛkṣeṇyaḥ pari kāṣṭhāsu jenya īḻenyo maho arbhāya jīvase |
purutrā yad abhavat sūr ahaibhyo garbhebhyo maghavā viśvadarśataḥ ||