Rig Veda · Chapter 1.145

tam pṛcchatā sa jagāmā sa veda sa cikitvām̐ īyate sā nv īyate |
tasmin santi praśiṣas tasminn iṣṭayaḥ sa vājasya śavasaḥ śuṣmiṇas patiḥ ||

tam it pṛcchanti na simo vi pṛcchati sveneva dhīro manasā yad agrabhīt |
na mṛṣyate prathamaṁ nāparaṁ vaco 'sya kratvā sacate apradṛpitaḥ ||

tam id gacchanti juhva1s tam arvatīr viśvāny ekaḥ śṛṇavad vacāṁsi me |
purupraiṣas taturir yajñasādhano 'cchidrotiḥ śiśur ādatta saṁ rabhaḥ ||

upasthāyaṁ carati yat samārata sadyo jātas tatsāra yujyebhiḥ |
abhi śvāntam mṛśate nāndye mude yad īṁ gacchanty uśatīr apiṣṭhitam ||

sa īm mṛgo apyo vanargur upa tvacy upamasyāṁ ni dhāyi |
vy abravīd vayunā martyebhyo 'gnir vidvām̐ ṛtacid dhi satyaḥ ||