Rig Veda · Chapter 1.126

amandān stomān pra bhare manīṣā sindhāv adhi kṣiyato bhāvyasya |
yo me sahasram amimīta savān atūrto rājā śrava icchamānaḥ ||

śataṁ rājño nādhamānasya niṣkāñ chatam aśvān prayatān sadya ādam |
śataṁ kakṣīvām̐ asurasya gonāṁ divi śravo 'jaram ā tatāna ||

upa mā śyāvāḥ svanayena dattā vadhūmanto daśa rathāso asthuḥ |
ṣaṣṭiḥ sahasram anu gavyam āgāt sanat kakṣīvām̐ abhipitve ahnām ||

catvāriṁśad daśarathasya śoṇāḥ sahasrasyāgre śreṇiṁ nayanti |
madacyutaḥ kṛśanāvato atyān kakṣīvanta ud amṛkṣanta pajrāḥ ||

pūrvām anu prayatim ā dade vas trīn yuktām̐ aṣṭāv aridhāyaso gāḥ |
subandhavo ye viśyā iva vrā anasvantaḥ śrava aiṣanta pajrāḥ ||

āgadhitā parigadhitā yā kaśīkeva jaṅgahe |
dadāti mahyaṁ yādurī yāśūnām bhojyā śatā ||

upopa me parā mṛśa mā me dabhrāṇi manyathāḥ |
sarvāham asmi romaśā gandhārīṇām ivāvikā ||