Rig Veda · Chapter 1.125

prātā ratnam prātaritvā dadhāti taṁ cikitvān pratigṛhyā ni dhatte |
tena prajāṁ vardhayamāna āyū rāyas poṣeṇa sacate suvīraḥ ||

sugur asat suhiraṇyaḥ svaśvo bṛhad asmai vaya indro dadhāti |
yas tvāyantaṁ vasunā prātaritvo mukṣījayeva padim utsināti ||

āyam adya sukṛtam prātar icchann iṣṭeḥ putraṁ vasumatā rathena |
aṁśoḥ sutam pāyaya matsarasya kṣayadvīraṁ vardhaya sūnṛtābhiḥ ||

upa kṣaranti sindhavo mayobhuva ījānaṁ ca yakṣyamāṇaṁ ca dhenavaḥ |
pṛṇantaṁ ca papuriṁ ca śravasyavo ghṛtasya dhārā upa yanti viśvataḥ ||

nākasya pṛṣṭhe adhi tiṣṭhati śrito yaḥ pṛṇāti sa ha deveṣu gacchati |
tasmā āpo ghṛtam arṣanti sindhavas tasmā iyaṁ dakṣiṇā pinvate sadā ||

dakṣiṇāvatām id imāni citrā dakṣiṇāvatāṁ divi sūryāsaḥ |
dakṣiṇāvanto amṛtam bhajante dakṣiṇāvantaḥ pra tiranta āyuḥ ||

mā pṛṇanto duritam ena āran mā jāriṣuḥ sūrayaḥ suvratāsaḥ |
anyas teṣām paridhir astu kaś cid apṛṇantam abhi saṁ yantu śokāḥ ||