Rig Veda · Chapter 1.120

kā rādhad dhotrāśvinā vāṁ ko vāṁ joṣa ubhayoḥ |
kathā vidhāty apracetāḥ ||

vidvāṁsāv id duraḥ pṛcched avidvān itthāparo acetāḥ |
nū cin nu marte akrau ||

tā vidvāṁsā havāmahe vāṁ tā no vidvāṁsā manma vocetam adya |
prārcad dayamāno yuvākuḥ ||

vi pṛcchāmi pākyā3 na devān vaṣaṭkṛtasyādbhutasya dasrā |
pātaṁ ca sahyaso yuvaṁ ca rabhyaso naḥ ||

pra yā ghoṣe bhṛgavāṇe na śobhe yayā vācā yajati pajriyo vām |
praiṣayur na vidvān ||

śrutaṁ gāyatraṁ takavānasyāhaṁ cid dhi rirebhāśvinā vām |
ākṣī śubhas patī dan ||

yuvaṁ hy āstam maho ran yuvaṁ vā yan niratataṁsatam |
tā no vasū sugopā syātam pātaṁ no vṛkād aghāyoḥ ||

mā kasmai dhātam abhy amitriṇe no mākutrā no gṛhebhyo dhenavo guḥ |
stanābhujo aśiśvīḥ ||

duhīyan mitradhitaye yuvāku rāye ca no mimītaṁ vājavatyai |
iṣe ca no mimītaṁ dhenumatyai ||

aśvinor asanaṁ ratham anaśvaṁ vājinīvatoḥ |
tenāham bhūri cākana ||

ayaṁ samaha mā tanūhyāte janām̐ anu |
somapeyaṁ sukho rathaḥ ||

adha svapnasya nir vide 'bhuñjataś ca revataḥ |
ubhā tā basri naśyataḥ ||