Rig Veda · Chapter 1.119

ā vāṁ ratham purumāyam manojuvaṁ jīrāśvaṁ yajñiyaṁ jīvase huve |
sahasraketuṁ vaninaṁ śatadvasuṁ śruṣṭīvānaṁ varivodhām abhi prayaḥ ||

ūrdhvā dhītiḥ praty asya prayāmany adhāyi śasman sam ayanta ā diśaḥ |
svadāmi gharmam prati yanty ūtaya ā vām ūrjānī ratham aśvināruhat ||

saṁ yan mithaḥ paspṛdhānāso agmata śubhe makhā amitā jāyavo raṇe |
yuvor aha pravaṇe cekite ratho yad aśvinā vahathaḥ sūrim ā varam ||

yuvam bhujyum bhuramāṇaṁ vibhir gataṁ svayuktibhir nivahantā pitṛbhya ā |
yāsiṣṭaṁ vartir vṛṣaṇā vijenya1ṁ divodāsāya mahi ceti vām avaḥ ||

yuvor aśvinā vapuṣe yuvāyujaṁ rathaṁ vāṇī yematur asya śardhyam |
ā vām patitvaṁ sakhyāya jagmuṣī yoṣāvṛṇīta jenyā yuvām patī ||

yuvaṁ rebham pariṣūter uruṣyatho himena gharmam paritaptam atraye |
yuvaṁ śayor avasam pipyathur gavi pra dīrgheṇa vandanas tāry āyuṣā ||

yuvaṁ vandanaṁ nirṛtaṁ jaraṇyayā rathaṁ na dasrā karaṇā sam invathaḥ |
kṣetrād ā vipraṁ janatho vipanyayā pra vām atra vidhate daṁsanā bhuvat ||

agacchataṁ kṛpamāṇam parāvati pituḥ svasya tyajasā nibādhitam |
svarvatīr ita ūtīr yuvor aha citrā abhīke abhavann abhiṣṭayaḥ ||

uta syā vām madhuman makṣikārapan made somasyauśijo huvanyati |
yuvaṁ dadhīco mana ā vivāsatho 'thā śiraḥ prati vām aśvyaṁ vadat ||

yuvam pedave puruvāram aśvinā spṛdhāṁ śvetaṁ tarutāraṁ duvasyathaḥ |
śaryair abhidyum pṛtanāsu duṣṭaraṁ carkṛtyam indram iva carṣaṇīsaham ||