Rig Veda · Chapter 1.020
ayaṁ devāya janmane stomo viprebhir āsayā |
akāri ratnadhātamaḥ ||
ya indrāya vacoyujā tatakṣur manasā harī |
śamībhir yajñam āśata ||
takṣan nāsatyābhyām parijmānaṁ sukhaṁ ratham |
takṣan dhenuṁ sabardughām ||
yuvānā pitarā punaḥ satyamantrā ṛjūyavaḥ |
ṛbhavo viṣṭy akrata ||
saṁ vo madāso agmatendreṇa ca marutvatā |
ādityebhiś ca rājabhiḥ ||
uta tyaṁ camasaṁ navaṁ tvaṣṭur devasya niṣkṛtam |
akarta caturaḥ punaḥ ||
te no ratnāni dhattana trir ā sāptāni sunvate |
ekam-ekaṁ suśastibhiḥ ||
adhārayanta vahnayo 'bhajanta sukṛtyayā |
bhāgaṁ deveṣu yajñiyam ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0