ऋग्वेद · अध्याय 1.020

अयं देवाय जन्मने स्तोमो विप्रेभिर् आसया ।
अकारि रत्नधातमः ॥

य इन्द्राय वचोयुजा ततक्षुर् मनसा हरी ।
शमीभिर् यज्ञम् आशत ॥

तक्षन् नासत्याभ्याम् परिज्मानं सुखं रथम् ।
तक्षन् धेनुं सबर्दुघाम् ॥

युवाना पितरा पुनः सत्यमन्त्रा ऋजूयवः ।
ऋभवो विष्ट्य् अक्रत ॥

सं वो मदासो अग्मतेन्द्रेण च मरुत्वता ।
आदित्येभिश् च राजभिः ॥

उत त्यं चमसं नवं त्वष्टुर् देवस्य निष्कृतम् ।
अकर्त चतुरः पुनः ॥

ते नो रत्नानि धत्तन त्रिर् आ साप्तानि सुन्वते ।
एकम्-एकं सुशस्तिभिः ॥

अधारयन्त वह्नयो ऽभजन्त सुकृत्यया ।
भागं देवेषु यज्ञियम् ॥