ऋग्वेद · अध्याय 1.019
प्रति त्यं चारुम् अध्वरं गोपीथाय प्र हूयसे ।
मरुद्भिर् अग्न आ गहि ॥
नहि देवो न मर्त्यो महस् तव क्रतुम् परः ।
मरुद्भिर् अग्न आ गहि ॥
ये महो रजसो विदुर् विश्वे देवासो अद्रुहः ।
मरुद्भिर् अग्न आ गहि ॥
य उग्रा अर्कम् आनृचुर् अनाधृष्टास ओजसा ।
मरुद्भिर् अग्न आ गहि ॥
ये शुभ्रा घोरवर्पसः सुक्षत्रासो रिशादसः ।
मरुद्भिर् अग्न आ गहि ॥
ये नाकस्याधि रोचने दिवि देवास आसते ।
मरुद्भिर् अग्न आ गहि ॥
य ईङ्खयन्ति पर्वतान् तिरः समुद्रम् अर्णवम् ।
मरुद्भिर् अग्न आ गहि ॥
आ ये तन्वन्ति रश्मिभिस् तिरः समुद्रम् ओजसा ।
मरुद्भिर् अग्न आ गहि ॥
अभि त्वा पूर्वपीतये सृजामि सोम्यम् मधु ।
मरुद्भिर् अग्न आ गहि ॥
मूल पाठ: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0