Rig Veda · Chapter 1.009

indrehi matsy andhaso viśvebhiḥ somaparvabhiḥ |
mahām̐ abhiṣṭir ojasā ||

em enaṁ sṛjatā sute mandim indrāya mandine |
cakriṁ viśvāni cakraye ||

matsvā suśipra mandibhiḥ stomebhir viśvacarṣaṇe |
sacaiṣu savaneṣv ā ||

asṛgram indra te giraḥ prati tvām ud ahāsata |
ajoṣā vṛṣabham patim ||

saṁ codaya citram arvāg rādha indra vareṇyam |
asad it te vibhu prabhu ||

asmān su tatra codayendra rāye rabhasvataḥ |
tuvidyumna yaśasvataḥ ||

saṁ gomad indra vājavad asme pṛthu śravo bṛhat |
viśvāyur dhehy akṣitam ||

asme dhehi śravo bṛhad dyumnaṁ sahasrasātamam |
indra tā rathinīr iṣaḥ ||

vasor indraṁ vasupatiṁ gīrbhir gṛṇanta ṛgmiyam |
homa gantāram ūtaye ||

sute-sute nyokase bṛhad bṛhata ed ariḥ |
indrāya śūṣam arcati ||