Rig Veda · Chapter 1.008

endra sānasiṁ rayiṁ sajitvānaṁ sadāsaham |
varṣiṣṭham ūtaye bhara ||

ni yena muṣṭihatyayā ni vṛtrā ruṇadhāmahai |
tvotāso ny arvatā ||

indra tvotāsa ā vayaṁ vajraṁ ghanā dadīmahi |
jayema saṁ yudhi spṛdhaḥ ||

vayaṁ śūrebhir astṛbhir indra tvayā yujā vayam |
sāsahyāma pṛtanyataḥ ||

mahām̐ indraḥ paraś ca nu mahitvam astu vajriṇe |
dyaur na prathinā śavaḥ ||

samohe vā ya āśata naras tokasya sanitau |
viprāso vā dhiyāyavaḥ ||

yaḥ kukṣiḥ somapātamaḥ samudra iva pinvate |
urvīr āpo na kākudaḥ ||

evā hy asya sūnṛtā virapśī gomatī mahī |
pakvā śākhā na dāśuṣe ||

evā hi te vibhūtaya ūtaya indra māvate |
sadyaś cit santi dāśuṣe ||

evā hy asya kāmyā stoma ukthaṁ ca śaṁsyā |
indrāya somapītaye ||