Ribhu Gita · Chapter 3

tṛtīyo'dhyāyaḥ/
punarjñānaṃ pravakṣyāmi nidāgha śṛṇu sādaram/
brahmaṇo'ti durūhatvādasakṛcchrāvyameva tat

sarvaṃ cinmayaṃ viddhi sarvaṃ saccinmayaṃ tatam/
saccidānandamadvaitaṃ saccidānandamavyayam

saccidānandamātraṃ hi saccidānandamanyakam/
saccidānandarūpo'haṃ saccidānandameva kham

saccidānandameva tvaṃ saccidānandako'smyaham/
manobuddhirahaṅkāracittasaṅghātakā amī

na tvaṃ nāhaṃ nacanyadvā sarvaṃ brahmaiva kevalam/
na vākyaṃ na padaṃ vedaṃ nākṣaraṃ na jaḍaṃ kvacit

na madhyaṃ nādi nāntaṃ vā na satyaṃ na nibandhanam/
na duḥkhaṃ na sukhaṃ bhāvaṃ na māyā prakṛtistathā

na dehaṃ na mukhaṃ ghrāṇaṃ na jihvā na ca tālunī/
na dantoṣṭhau lalāṭaṃ ca niśvāsocchvāsa eva ca

na svedamasthimāsaṃ ca na raktaṃ na ca mūtrakam/
na dūraṃ nāntikaṃ nāhaṃ nodaraṃ na kirīṭakam

na hastapādacalanaṃ na śāstraṃ na ca śāsanam/
na vettā vedanaṃ vedyaṃ na jāgratsvapnasuptayaḥ

turyātītaṃ na me kiñcitsarvaṃ saccinmayaṃ tatam/
nādhyātmikaṃ nādhibhūtaṃ nādhidaivaṃ na māyikam

na viśvastaijasaḥ prājñaḥ virāṭsūtrātmakeśvarāḥ/
na gamāgamaceṣṭā ca na naṣṣṭaṃ na prayojanam

tyājyaṃ grāhyaṃ na dūṣyaṃ vā hyamedhyaṃ medhyakaṃ tathā/
na pīnaṃ na kṛśaṃ kledaṃ na kālaṃ deśabhāṣaṇam

na sarvaṃ na bhayaṃ caitanna vṛkṣatṛṇaparvatāḥ/
na dhyānaṃ yogasaṃsiddhirnabrahmakṣatravaiśyakam

na pakṣī na mṛgo nāgī na lobho moha eva ca/
na mado na ca mātsaryaṃ kāmakrodhādayastathā

na strīśūdrabiḍālādi bhakṣyabhojyādikaṃ ca yat/
na prauḍhahīnanāstikyaṃ na vārtāvasarosti hi

na laukiko na lokovā na vyāpāro na mūḍhatā/
na bhoktā bhojanaṃ bhojyaṃ mātṛmānaṃ na meyakam

na śatrumitraputrādi na mātā na pitā svasā|
na janma na mṛtirvṛddhirna deho'hamiti bhramaḥ

na śūnyaṃ nāpi caśūnyaṃ nāntaḥkaraṇasaṃsmṛtiḥ/
na rātrirnadivā naktaṃ na brahmā na hariśśivaḥ

na vārapakṣamāsādi vatsaraṃ na ca cañcalam/
na brahmaloko vaikuṇṭho na kailāso na canyakaḥ

na svargo na ca devendro nāgniloko na cagnikaḥ/
na yamo na yamaloko vā na lokā lokapālakāḥ

na bhūrbhuvassvastrailokyaṃ na pātāḻaṃ na bhūtalaṃ/
nāvidyā na ca vidyā ca na māyā prakṛtirna ca

na sthiraṃ kṣaṇikaṃ nāśo na gatirna ca dhāvanam/
na dhyātavyaṃ na me snānaṃ na mantro na japaḥ kvacit

na padārthaṃ na pūjārhaṃ nābhiṣekaṃ na carcanaṃ/
na puṣpaṃ na phalaṃ patraṃ gandhapuṣpādidhūpakam

na stotraṃ na namaskāro na pradakṣiṇamaṇvapi/
na prārthanā pṛthagbhāvo na havirnāsti vandanam

na homo na ca karmāṇi na durvākyaṃ subhāṣaṇam/
na gāyatrī na vā sandhirna manasyaṃ na duḥsthitiḥ

na durāśā na duṣṭātmā na caṇḍālo na paulkasaḥ/
na dussahaṃ durālāpaṃ na kirāto na kaitavam

na pakṣapātaṃ pakṣaṃ vā na vibhūṣaṇataskarau/
na ca ḍaṃbho ḍāṃbhiko vā na hīno nādhiko naraḥ

naikaṃ dvayaṃ trayaṃ turyaṃ na mahatvaṃ na calpatā/
na pūrṇaṃ na paricchinnaṃ na kāśī na vrataṃ tapaḥ

na gotraṃ na kulaṃ sūtraṃ na vibhutvaṃ na śūnyatā/
na strīrna yoṣinno vṛddhā na kanyā na vitantukā

na sūtakaṃ na jātaṃ vā nāntarmukhasuvibhramaḥ/
na mahāvākyamaikyaṃ vā nāṇimādivibhūtayaḥ

evaṃ salakṣaṇaṃ brahma vyatirekamukhena vai/
nidāgha tvaṃ vijānīhi brahmetaraniṣedhataḥ

brahmaṇaḥ prakṛtasyātra dvividhaṃ pratipādanaṃ/
asanniṣedharūpaṃ sadvidhirūpaṃ ca tatra tu

ātmā niṣedharūpeṇa tubhyaṃ saṃpratipāditaḥ/
athādya vidhirūpeṇa śṛṇu saṃpratipādyate

sarvaṃ caitanyamātratvātsarvadoṣassadānahi/
sarvaṃ sanmātrarūpatvātsaccidānandarūpakam

brahmaiva sarvaṃ nānyo'smi tadahaṃ tadahaṃ tathā/
tadevāhaṃ tadevāhaṃ brahmaivāhaṃ sanātanam

brahmaivāhaṃ na saṃsārī brahmaivāhaṃ na me manaḥ/
brahmaivāhaṃ na me siddhirbrahmaivāhaṃ na cendriyam

brahmaivāhaṃ na deho'haṃ brahmaivāhaṃ na gocaraḥ/
brahmaivāhaṃ na jīvo'haṃ brahmaivāhaṃ na bheda bhūḥ

brahmaivāhaṃ jaḍo nāhamahaṃ brahma na me mṛtiḥ/
brahmaivāhaṃ na ca prāṇo brahmaivāhaṃ parātparam

idaṃ brahma paraṃ brahma satyaṃ brahma prabhurhi saḥ/
kālo brahma kalā brahma sukhaṃ brahma svayaṃprabham

ekaṃ brahma dvayaṃ brahma moho brahma śamādikam/
doṣo brahma guṇo brahma diśaśśāntarvibhuḥ prabhuḥ

lokā brahma gururbrahma śiṣyo brahma sadāśivaḥ/
pūrvaṃ brahma paraṃ brahma śuddhaṃ brahma śubhāśubham

jīva eva sadā brahma saccidānandamasmyaham/
sarvaṃ brahmamayaṃ proktaṃ sarvaṃ brahmamayaṃ jagat

svayaṃ brahma na sandehaḥ svasmādanyanna kiñcana/
sarvamātmaiva śuddhātmā sarvaṃ cinmātramavyayam

nityanirmalarūpātmā hyātmanonyanna kiñcana/
aṇumātralasadrūpamaṇumātramidaṃ jagat

aṇumātraṃ śarīraṃ vā hyaṇumātramasatyakam/
aṇumātraṃ manaścittamaṇumatrāpyahaṅkṛtiḥ

aṇumātrā ca buddhiśca hyaṇumātro'pi jīvakam/
aṇumātramidaṃ cittaṃ sarvamapyaṇumātrakam

brahmaiva sarvaṃ cinmātraṃ brahmamātraṃ jagattrayam/
ānandaṃ paramānandamanyatkiñcinnakiñcana

caitanyamātramoṅkāraṃ brahmaiva bhavati svayam/
ahameva jagatsarvamahameva paraṃpadam

ahameva guṇātītosmyahameva parātparaḥ/
ahameva paraṃbrahma hyahameva gurorguruḥ

ahamevākhilādhārosmyahameva sukhātsukham/
ātmanonyajjagannāsti hyātmanonyatsukhaṃ na ca

ātmanonyā gatirnāsti sarvamātmamayaṃ jagat/
ātmanonyannahi kvāpi ātamanonyattṛṇaṃ na hi

ātmanonyattuṣaṃ nāsti sarvamātmamayaṃ jagat/
brahmamātramidaṃ sarvaṃ brahmamātramasanna hi

brahmamātramidaṃ sarvaṃ svayaṃ brahmaiva kevalam/
brahmamātraṃ vrataṃ sarvaṃ brahmamātraṃ rasaṃ sukham

brahmamātraṃ cidākāśaṃ saccidānandamadvayaṃm/
brahmaṇonyataraṃ nāsti brahmaṇonyanna kiñcana

brahmaṇonyadahaṃ nāsti brahmaṇonyatphalaṃ nahi/
brahmaṇonyatpadaṃ nāsti brahmaṇonyatpadaṃ nahi

brahmaṇonyadgururnāsti brahmaṇonyadasadvapuḥ/
brahmaṇonyannacahantā tvattedaṃ tena hi kvacit

svayaṃ brahmātmakaṃ viddhi svasmādanyannakiñcana/
yatkiñciddṛśyate loke yatkiñcidbhāṣyate janaiḥ

yatkiñcitkriyate nityaṃ yatkiñcidgamyate janaiḥ/
yatkiñcidbhujyate kvāpi tatsarvamasadeva hi

kartṛbhedaṃ kriyābhedaṃ guṇabhedaṃ rasādikam/
liṅgabhedamidaṃ sarvamasadeva sadā sukham

kālabhedaṃ deśabhedaṃ vastubhedaṃ jayājayam/
yadyadbhedaṃ ca tatsarvamasadevahi kevalam

asadantaḥkaraṇamasadevendriyādikam/
asatprāṇādikaṃ sarvaṃ saṅghātamasadātmakam

asatyaṃ pañcakośākhyamasatyāḥ pañcadevatāḥ/
asatyaṃ ṣaḍvikārādi hyasatyamarivargakam

asatyaṣṣadṛtuścaiva hyasatyaṣṣaḍrasassadā/
saptarṣayopyasatyāstepyasatyāssaptasāgarāḥ

saccidānandamātrohamanutpannamidaṃ jagat/
ātmaivāhaṃ paraṃsatyo nānyāssaṃsāradṛṣṭayaḥ

satyamānandarūpohaṃ cidghanānandavigrahaḥ/
ahameva parānando'smyahameva parātparaḥ

jñānākāramidaṃ sarvaṃ jñānānandohamadvayaḥ/
jñānaprakāśarūpohaṃ jñānānandaikavigrahaḥ

yena jñātamidaṃ jñānamajñānadhvāntanāśakaḥ/
jñānenājñānanāśena sa hi jñānī samīryate

jñānaṃ yathā dvidhā proktaṃ svarūpaṃ vṛttirityapi/
ajñānaṃ ca tathā viddhi mūlaṃ ca pratibandhkam

yathā jñānaṃ vinā loke kiñcideva na siddhyati/
tathā jñānaṃ vinā loke kvacinmuktirna siddhyati

jñānadvayaṃ tathā'jñānadvayamapyatravarṣmaṇi/
sarvadā bhānti jīvānaṃ jñānājñānoktidarśanāt

jñānasya kva tirobhāvo jñānasyāvirbhavastathā/
dṛṣṭassarvatra lokesmin durlabhohi viparyayaḥ

jñānaṃ sarvāntaraṃ bhāti kūṭasthātmasvarūpakam/
prajñāmātramidaṃ sūkṣmaṃ ko'pi jānāti puṇyakṛt

prajñāyāṃ kalpitāṃ prajñāṃ prajñayaiva vihāya yaḥ/
prajñāmātreṇa santiṣṭet sa prajñāvānitīryate

bahiḥ prajñāṃ sadotsṛjyāpyantaḥ prajñāṃ ca yo budhaḥ/
kayāpi prajñayopetaḥ prajñāvāniti kathyate

prajñaiva yasya netraṃ syat prajñaiva śrotramindriyam/
anyacca sarvaṃ prajñaiva sa prājñaḥ puruṣottamaḥ

prajñayā jāyate sarvaṃ prajñayā pālyate'khilam/
prajñayā kṣīyate sarvaṃ tasmātprajñāṃ samāśraya

prajñāhīnamasatsarvaṃ prajñāhīnaṃ jaḍaṃ khalu/
prajñāhīnaṃ sadā duḥkhaṃ tasmātprajñāṃ samāśraya

na vinā prajñayā puṇyaṃ na lokaḥ prajñayā vinā/
vinā na prajñayā'bhīṣṭaṃ tasmātprajñāṃ samāśraya

susūkṣmayā dhiyā prajñāmimāṃ tāṃ jñaptisañjñikām/
jñātvā bhavabhavānmukto nirguṇabrahmarūpiṇīm

jāgradādyāsvavasthāsu yā jñaptistrisṛṣu svayam/
ābhāsatopyanusyūtā jñaptissā nirmalā svataḥ

jñaptissā sākṣiṇī nityā turyā sarvaśrutīritā/
viṣayajñaptisantyāgāt jñāyate vibudhaissvataḥ

jñaptireva paraṃbrahma jñaptireva paraṃ padam/
jñaptireva paro mokṣo jñaptireva paraṃ sukham

jñaptireva parācāryo jñaptireva parāmṛtam/
jñaptireva parātṛptirjñaptireva parāgatiḥ

tasmātjñaptiṃ samāśritya vijñaptidhiṣaṇāṃ tyaja/
ajñapterduḥkhahetutvātsukhārthījñaptimāśraya

ajñapti voṣayo jīvaḥ kūṭastho jñapti gocaraḥ/
heyopādeyatā siddhā dharmadharmitvatastayoḥ

ahaṃpratyayaśabdābhyāṃ vijñeyo jīvasañjñakaḥ/
asmatpratyayaśabdābhyāṃ jñeyo kūṭasthasañjñakaḥ

yadahaṃ pratyayī jīvastadyuṣmatpratyayī ca saḥ/
tvamahaṃ śabdayoraikyāttatsākṣī pratyagāhvayaḥ

asmatpratyayinaṃ sākṣicaitanyātmakamadvayam/
kūṭasthaṃ pratyagātmānaṃ sākṣādviṣayiṇaṃ param

jahi jñātvā tadanyaṃ tvamahaṃpratyayinaṃ bahiḥ/
sākṣyaṃ jīvaṃ cidābhāsaṃ parāñcaṃ viṣayaṃ svataḥ

dṛgdṛśyabhūtayoratra jīvātmapratyagātmanoḥ/
vivekena paraṃ saukhyaṃ nidāgha vraja santatam

//iti śrī gurujñānavāsiṣṭhe tattvanārāyaṇe
jñānakāṇḍasya prathamapāde pañcamo'dhyāyaḥ evaṃ
śrī ṛbhugītā tṛtīyo'dhyāyaḥ samāptaḥ//
saṃbaṃdhita kaḍiyām̐
ṛbhugītā
ṛbhugītā १
ṛbhugītā २
ṛbhugītā ३
ṛbhugītā ४
gītā
bāharī kaḍiyām̐