Ribhu Gita · Chapter 4

caturtho'dhyāyaḥ/
punarjñānaṃ pravakṣyāmi jāgradādi vilakṣaṇam/
turīyabrahmarūpaṃ tadyadjñātvā mokṣyase'śubhāt

ūrṇanābhiryathātantūn sṛjate saṃharatyapi/
jāgratsvapne tathā jīvo gacchatyāgacchate punaḥ

netre jāgaritaṃ vidyātkaṇṭhe svapnaṃ samāviśet/
suṣuptaṃ hṛdayasthaṃ tu turīyaṃ mūrdhni saṃsthitam

yato vaco nivartante aprāpya manasā saha/
ānandametajjīvasya yajjñātvā mucyate budhaḥ

sarvavyāpinamātmānaṃ kṣīresarpirivārpitam/
ātmavidyā tapomūlaṃ tad brahmopaniṣatpadaṃ

[śrī gurumūrtiḥ]
ṛbhuṇoktamidaṃ śrutvā nidāghassaṃśayākulaḥ/
papraccha sadguruṃ śāntaṃ sāvadhānena cetasā

[nidāghaḥ]
bhagavan bhavatā pūrvaṃ yatovāca iti śruteḥ/
ānando brahmaṇaḥ prokto jīvasyatvadhunocyate

ānandamayasaṃjñasya jīvasyoktaśca yadyapi/
śrutau tathāpi heyatvānnatadīyo bhaveddhi saḥ

nāvāṅmanasagamyatvaṃ jīvasya khalu yujyate/
nānandasya ca vedyatvavacanād brahmaṇohi tat

evaṃ pṛṣṭo muniśreṣṭo nidāghena mahātmanā/
ṛbhuḥ provāca sarvajño brahman sasmitamādarāt

brahmoktaṃ jīvaśabdena hyavāṅmanasagocaram/
mokṣātītadaśāyāṃ yajjīvastad brahmatāṃ vrajet

pūrvottaravirodho vā madvākyeṣu na tadbhavet/
śrutyarthasyoparodho vā samyagālocya niścinu

upasaṃkramitavyo yadānandamaya ucyate/
vedyatvaṃ tasyacasiddhaṃ pucchasyāviṣayatvataḥ

tasmātsvayaṃ sadāpūrṇaḥ pañcamasya vikāriṇaḥ/
ātmasthānīya ānanda iha vedya iti sthitiḥ

bhṛgave varuṇenaivaṃ taittirīyābhidaśrutau/
pañcamasya vikāritvaṃ na proktamiticecchṛṇu

mayaṭprayogābhāvena hetunā nirvikāratā/
na śaṅkyā pūrvaparyāyeṣvannādiṣvapyadarśanāt

ataṣṣaṣṭaṃ paraṃbrahma pañcamenopalakṣitam/
nirguṇaṃ bhṛgave pitrā proktamityavadhāraya

prācuryārthakatāyāṃ tu mayaṭo nirvikāriṇaḥ/
saccidānandarūpasya brahmaṇo vedyatā bhavet

śārīratvābhidānena pūrvānandamayasya tu/
vikāritvaṃ punasspaṣṭamupasaṃkramaṇena ca

nānukarṣaśca pucchasya pūrvapūrvasya dṛśyate/
uttarottarakośe prāktattadātmānukarṣaṇāt

upasaṃkramaṇaṃ coktaṃ mayaḍantasya kevalam/
ānandasya tatonyasya na parātmatayā khalu

brahmavitparamāpnotītyādau dvaividhyamīritam/
yattatsarūpārūpābhyāṃ brahmaṇonte ca niścinu

ātmasthānīyacidrūpānandabrahmavidomune/
prārabdhānte pucchabhūtā'rūpabrahmāptiriṣyate

pratiṣṭhāśabdagamyatvātsarvaśeṣitvatopi ca/
śāstrasyārūpavad brahmaprādhānyaṃ yadyapi sthitam

tathāpivedyatā'bhāvādarūpasya mumukṣubhiḥ/
ānandarūpavad brahmaprādhānyaṃ mukhyamiṣyate

modapramodayoścaivaṃ sati vedyatvamāpatet/
iticennaiṣa doṣosti tayorbrahmāṃśatā yataḥ

brahmaṇassvagate bhede nityasiddhe mumukṣuvaḥ/
upekṣituṃ samarthāssyurnidāgha kathamatra te

sthūlārthadarśino ye vai śuṣkādvaitasamāśrayāḥ/
teṣāṃ sāvayavatvādi doṣassphuratu cetasi

na tāvatā tripācchrutyādyanurodhena niścitam/
svabhedaṃ viduṣāṃ kiñcicchidyate muktajanmanām

sūkṣmabuddhyā vicare hi svātmabhedaḥ prakāśate/
atyantābhedavārtāyāṃ pucchagāyāṃ phalaṃ kimu

ete kośā hi pañcaiva tisro'vasthāssamīritāḥ/
jāgradādyāḥ krameṇaitadbhedaṃ ca śṛṇu sādaram

ādyā jāgaritā'vasthā dvitīyā svapnasaṃjñikā/
tṛtīyā suptirūpānyā turīyā citsukhātmikā

ādyābhimānī viśvākhyo dvitīyastaijasassmṛtaḥ/
tṛtīyaḥ prājña etebhyo kūṭastha itaraḥ prabhuḥ

bahiḥprajño vibhurviśvo hyantaḥprajñastu taijasaḥ/
ghanaprajñastathā prājña eka eva trithā sthitaḥ

dakṣiṇākṣimukhe viśvo manasyatantastu taijasaḥ/
ākāśe ca hṛdi prājñastrithā dehe vyavasthitaḥ

viśvo hi sthūlabhuṅnityaṃ taijasaḥ praviviktabhuk/
ānandabhuktathā prājñastrithā bhogaṃ nibodha ca

sthūlaṃ tarpayate viśvaṃ praviviktaṃ tu taijasam/
ānandaśca tathā prājñaṃ trithā tṛptiṃ nibodha ca

triṣu dhāmasu yadbhojyaṃ bhoktā yaśca prakīrtitaḥ/
vedaitadubhayaṃ yastu sa bhuñjāno na lipyate

prabhavassarvabhāvānāṃ satāmiti viniścayaḥ/
sarvaṃ janayati prāṇaścetoṃśūnpuruṣaḥ pṛthak

vibhūtiṃ prasavantvanye manyante sṛṣṭicintakāḥ/
svapnamāyāsvarūpeti sṛṣṭiranyairvikalpitā

icchāmātraṃ prabhossṛṣṭiriti sṛṣṭau viniścitāḥ/
kālātprasūtiṃ bhūtānāṃ manyante kālacintakāḥ

bhogārthaṃ sṛṣṭirityanye krīḍārthamiticapare/
devasyaiṣa svabhāvoyamāptakāmasya kā spṛhā

āptakāmasya devasya turyasyoktasya suvrata/
svarūpaṃ procyate samyaṅnidāgha śṛṇu tattvataḥ

nāntaḥprajñaṃ bahiḥprajñaṃ na prajñaṃ nobhayātmakaṃ/
na prajñānaghanaṃ prajñaṃ nāprajñaṃ na ca kevalam

idaṃtve natadgrāhyamadṛśyaṃ capyalakṣaṇam/
acintyāvyavahāryaṃ cavyapadeśaṃ pṛthaktayā

ekātmapratyayaṃ sāraṃ prapañcopaśamaṃ śivaṃ/
śāntaṃ caturthamadvaitaṃ manyante brahmavādinaḥ

sa ātmā sa hi vijñeyaḥ sarvairapi mumukṣubhiḥ/
turyātmajñānahīnānāṃ na muktisyādkadācana

nivṛttessarvaduḥkhānāmīśānaḥ prabhuravyayaḥ/
advaitassarvabhāvānāṃ devasturyo vibhussmṛtaḥ

kāryakāraṇabaddhau tāviṣyete viśvataijasau/
prājñaḥ kāraṇabaddhastu dvau tau turye na siddhyataḥ

nātmānaṃ na paraṃ caiva na satyaṃ nāpicanṛtaṃ/
prājñaḥ kiṃca na saṃvetti turyaṃ tatsarvadṛksadā

dvaitasyāgrahaṇaṃ tulyamubhayoḥ prājñaturyayoḥ/
bījanidrāyutaḥ prājñassā ca turye na vidyate

svapnanidrāyutāvādyau prājñastvasvapnanidrayā/
na nidrāṃ naiva ca svapnaṃ turye paśyanti niścitāḥ

anyathāgṛhṇatassvapno nidrā tattvamajānataḥ/
viparyāse tayoḥ kṣīṇe turīyaṃ padamaśnute

anādimāyayā supto yadā jīvaḥ prabudhyate/
ajamadvaitamasvapnamanidraṃ budhyate tadā

prapañco yadi vidyeta nivarteta na saṃśayaḥ/
māyāmātramidaṃ dvaitamadvaitaṃ paramārthataḥ

vikalpo vinivarteta kalpito yadi kenacit/
upadeśādayaṃ vādo jñāte dvaitaṃ na vidyate

[nidāghaḥ]
bhagavan kathamadvaitaṃ brahmadvaividhyavādinaḥ/
bhavatobhimataṃ tatra saṃśayo me bhavatyalam

[ṛbhuḥ]
dvaitaprapañcaśūnyesmin nirguṇe pūrṇacidghane/
brahmaṇyadvaitasaṃsiddhiryato nānyatra sarvadhā

atassarūpārūpābhyāṃ brahmadvaividhyavādinaḥ/
mamaivādvaitavāditvannārūpādvaitavādinaḥ

dvaitādvaitobhayātīte vyvahārādyagocare/
nīrūpe brahmaṇi prājñā'dvaitavādaḥ kathaṃ bhavet

dvaitācidrūpakāryasyādvaitacidrūpakāraṇāt/
nivṛttisyādyathādīpāttamaso natvarūpataḥ

ato nādvaitasiddhisyātkathañcidapi sattama/
arūpāgocarabrahmavādināṃ tādṛśe mate

cidrūpabrahmatādātmyaṃ jīvasya hi vivakṣitam/
nārūpavākyadūratvāttannādvaitamarūpiṇām

yadyapyarūpabrahmatvaṃ jīvasyānte prasiddhyati/
tathāpyadvaititāṃ vaktuṃ na śakyaṃ dvandvahānitaḥ

vācyavācakahīne ca lakṣyalakṣaṇavarjite/
kathamadvaitaśabdoyaṃ sāvakāśo bhavenmune

[nidāghaḥ]
devatāpuruṣādyairhi vedaśabdaissamīryate/
tasyaupaniṣadatvasyāvyabhicarostyarūpiṇaḥ

tatosya śabdagamyatvāt praṣṭavyatvaṃ mayā bhavet/
vācyatvaṃ ca tvayetyadya manye śrīgurunāyaka

[ṛbhuḥ]
arūpabrahmaviṣayāśśbdāssantyeva yadyapi/
tenaupaniṣadatvaṃ ca kathañcittasya siddhyati

tathāpi praśnayogyatvaṃ vācyatvaṃ vā na siddhyati/
rūḍhyarthamātravattvenālakṣakatvādayogataḥ

yogārthavadbhiśśabdairhi lakṣakairvācakaiśca vā/
śiṣyebhyaḥ procyate satyaṃvastu śrīgurumūrtibhiḥ

arūpavastunaḥ praśnaḥ pratiṣiddhaśśrutau yataḥ/
yājñavalkyena gārgyai tannatvaṃ praṣṭumihārhasi

tasmāt turīyaṃ sad brahma yogavṛttyaiva lakṣaṇaiḥ/
saccidānandapūrvaistvaṃ maduktaṃ viddhi muktaye

jāgratyannamayaṃ kośaṃ sthūladehaṃ ca viddhi vai/
svapne praṇamanojñānamayāssūkṣmavapustataḥ

suṣuptau kāraṇaṃ dehamānandamayakośakam/
turīye tvaśarīraṃ taccidrūpaṃ kośavarjitam

sa eva māyāparimohitātmā śarīramāsthāya karoti sarvam/
stryannapānādi vicitrabhogaissa eva jāgratparitṛptimeti

svapne'pi jīvassukhaduḥkhabhoktā svamāyayā kalpitaviśvaloke/
suṣuptikāle sakale vilīne tamobhibhūtassukharūpameti

punaśca janmāntarakarmayogātsa eva jīvassvapitiprabuddhaḥ/
puratraye krīḍati yastu jīvastatastu jātaṃ sakalaṃ vicitram

ādhāramānandamakhaṇḍabodhaṃ yasmin layaṃ yāti puratrayaṃ ca/
yatsarvavedāntarahasyatattvaṃ yatpūrṇacaitanyanijasvarūpaṃ

etasmājjāyate prāṇo manassarvendriyāṇi ca/
khaṃ vāyurjyotirāpaḥ pṛthvī sarvasya dhāriṇī

yatparaṃbrahma sarvātmā viśvasyāyatanaṃ mahat/
sūkṣmātsūkṣmataraṃ nityaṃ tattvameva tvameva tat

jāgratsvapnasuṣuptyādiprapañcaṃ yatprakāśate/
tad brahmāhamitijñātvā sarvabandhaiḥ pramucyate

triṣu dhāmasu yadbhojyaṃ bhoktā bhogaśca yadbhavet/
tebhyo vilakṣaṇassākṣi cinmātrohaṃ sadāśivaḥ

mayyeva sakalaṃ jātaṃ mayi sarvaṃ pratiṣṭhitam/
mayi sarvaṃ layaṃ yāti tad brahmādvayamasmyaham

aṇoraṇīyānahameva tadvanmahānahaṃ viśvamidaṃ vicitram/
purātano'haṃ puruṣo'hamīśo hiraṇmayo'haṃ śivarūpamasmi

apāṇipādo'hamacintyaśaktiḥ paśyāmyacakṣussaśruṇomyakarṇaḥ/
ahaṃ vijānāmi viviktarūpo na casti vettā mama citsadā'haṃ

vedairanekairahameva vedyo vedāntakṛdvedavidevacaham/
na puṇyapāpe mama nāsti nāśo na janmadehendriyabuddhirasti

na bhūmirāpo mama vahnirasti na canilome'sti na cambaraṃ ca/
evaṃ viditvā paramārtharūpaṃ guhāśayaṃ niṣkaḻamadvitīyam

akhaṇḍamādyantavihīnamekaṃ tejomayānandaghanasvarūpam/
samastasākṣiṃ sadasadvihīnaṃ prayāti śuddhaṃ paramārthatattvam

[śrī gurumūrtiḥ]
evaṃ śrutvā nidāghassa ṛbhuvaktrādyadārthataḥ/
brahmaivāhamiti jñātvā kṛtakṛtyo'bhavadvidhe

yatastvaṃ ca parātmānaṃ śrutavānasi manmukhāt/
tvaṃ ca dhanyaḥ punaḥ pṛccha śrotavyāntaramasticet

//iti śrī gurujñānavāsiṣṭhe tattvanārāyaṇe
jñānakāṇḍasya prathamapāde ṣaṣṭho'dhyāyaḥ evaṃ
śrī ṛbhugītākhyo'yaṃ granthassamāptaḥ//
//ॐ tatsat//
saṃbaṃdhita kaḍiyām̐
ṛbhugītā
ṛbhugītā १
ṛbhugītā २
ṛbhugītā ३
ṛbhugītā ४
gītā
bāharī kaḍiyām̐