Scripture Library

Revākhāṇḍa (revised text) · Chapter 99

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe prabhāsatīrthamāhātmyavarṇanaṃ nāmāṣṭanavatitamo 'dhyāyaḥ ||
RKV adhyāya 99
śrīmārkaṇḍeya uvāca:
tato gacchenmahīpāla narmadādakṣiṇe taṭe /
sthāpitaṃ vāsukīśaṃ tu samastāghaughanāśanam

99.2

yudhiṣṭhira uvāca:
kasmācca kāraṇāttāta revāyā dakṣiṇe taṭe /
vāsukīśasthāpito vai vistarādvada me guro

99.3

śrīmārkaṇḍeya uvāca:
etatsarvaṃ samāsthāya nṛtyaṃ śambhuścakāra vai

99.4

śramādajāyata svedo gaṅgātoyavimiśritam /
patantamurago 'śnāti haramaulivinirgatam

99.5

mandākinī tataḥ kruddhā vyālasyopari bhārata /
prāpnuhyajagarat tvaṃ hi bhujaṅga kṣudrajantuka

99.6

vāsukiruvāca:
anugrāhyo 'smi te pāpo durnayo 'haṃ harādṛte /
trailokyapāvanī puṇyā sarittvaṃ śubhalakṣaṇā

99.7

saṃsāracchedanakarī hyārtānāmārtināśanī /
svargadvāre sthitā tvaṃ hi dayāṃ kuru mayīśvari

99.8

gaṅgovāca:
kuruṣva vipulaṃ vindhyaṃ tapastvaṃ śaṅkaraṃ prati /
tataḥ prāpsyasi svaṃ sthānaṃ pannagatvaṃ mamājñayā

99.9

śrīmārkaṇḍeya uvāca:
tato 'sau tvarito vindhyaṃ nāgo gatvā nagaṃ śubham /
tapas taptuṃ samārebhe śaṅkarārādhanodyataḥ

99.10

nityaṃ dadhyau mahādevaṃ tryakṣaṃ ḍamarukodyatam /
tato varṣaśate pūrṇa uparuddho jagadguruḥ /
āgatastatsamīpaṃ tu ślakṣṇāṃ vāṇīmudāharat

99.11

varaṃ varaya me vatsa pannaga tvaṃ kṛtādara

99.12

vāsukir uvāca:
yadi tuṣṭo 'si me deva varaṃ dāsyasi śaṅkara /
prasādāttava deveśa bhūyānniṣpāpatā mama /
tīrthaṃ kiṃcitsamākhyāhi sarvapāpapraṇāśanam

99.13

īśvara uvāca:
pannaga tvaṃ mahābāho revāṃ gaccha śubhaṃkarīm /
yāmye tasyāstaṭe puṇye snānaṃ kuru yathāvidhi

99.14

ityuktvāntardadhe devo vāsukistvarayānvitaḥ /
rūpeṇājagareṇaiva praviṣṭo narmadājalam

99.15

mārgeṇa tasya saṃjātaṃ jāhnavyāḥ srota uttamam /
nirdhūtakalmaṣaḥ sarpaḥ saṃjāto narmadājale

99.16

sthāpitaḥ śaṅkarastatra narmadāyāṃ yudhiṣṭhira /
tato nāgeśvaraṃ liṅgaṃ prasiddhaṃ pāpanāśanam

99.17

aṣṭamyāṃ vā caturdaśyāṃ snāpayenmadhunā śivam /
vimuktakalmaṣaḥ sadyo jāyate nātra saṃśayaḥ

99.18

aputrā ye narāḥ pārtha snānaṃ kurvanti saṅgame /
te labhante sutāñchreṣṭhān kārttavīryopamāñchubhān

99.19

śrāddhaṃ tatraiva yaḥ kuryād upavāsaparāyaṇaḥ /
kurvanpramocayetpretānnarakānnṛpanandana

99.20

sarpāṇāṃ ca bhayaṃ vaṃśe jñātivarge na jāyate /
nirdoṣaṃ nandate tasya kulaṃ nāgaprasādataḥ

99.21

etatte sarvamākhyātaṃ tava snehānnṛpottama

Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0