Revākhāṇḍa (revised text) · Chapter 100
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nāgeśvaratīrthamāhātmyavarṇanaṃ nāmaikonaśatatamo 'dhyāyaḥ ||
RKV adhyāya 100
śrīmārkaṇḍeya uvāca:
tato gacchenmahīpāla tīrthaṃ paramarocanam /
mārkaṇḍeśamiti khyātaṃ narmadādakṣiṇe taṭe
uttamaṃ sarvatīrthānāṃ gīrvāṇair vanditaṃ śivam /
guhyādguhyataraṃ putra nākhyātaṃ kasyacinmayā
sthāpitaṃ tu mayā pūrvaṃ svargasopānasaṃnibham /
jñānaṃ tatraiva me jātaṃ prasādācchaṅkarasya ca
anyastatraiva yo gatvā drupadāmantarjale japet /
sa pātakairaśeṣaśca mucyate pāṇḍunandana
vācikair mānasaiśca vā karmajairapi pātakaiḥ /
piṇḍikāṃ cāpyavaṣṭabhya yāmyāmāśāṃ ca saṃsthitaḥ
yojayecchūlinaṃ bhaktyā dvātriṃśadbahurūpiṇam /
dehapāte śivaṃ gacchediti me niścayo nṛpa
ājyena bodhayeddīpamaṣṭamyāṃ niśi bhārata /
svargalokamavāpnoti ityevaṃ śaṅkaro 'bravīt
śrāddhaṃ tatraiva yo bhaktyā kurvīta nṛpanandana /
pitarastasya tṛpyanti yāvadābhūtasamplavam
iṅgudairbadarairbilvairakṣatena jalena vā /
tarpayet tatra yo vaṃśyānāpnuyājjanmanaḥ phalam
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0