Revākhāṇḍa (revised text) · Chapter 61
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ādityeśvaratīrthamāhātmyavarṇanaṃ nāma ṣaṣṭitamo 'dhyāyaḥ ||
RKV adhyāya 61
śrīmārkaṇḍeya uvāca:
tato gacchet paraṃ puṇyaṃ narmadādakṣiṇe taṭe /
śakratīrthaṃ suvikhyātam aśeṣāghavināśanam
purā śakreṇa tatraiva tapo vai duratikramam /
prārabdhaṃ parayā bhaktyā devaṃ prati maheśvaram
tataḥ saṃtoṣito deva umāpatir narādhipa /
devendratvaṃ varaṃ rājyaṃ dānavānāṃ vadhaṃ dadau
labdhaṃ śakreṇa nṛpate narmadātīrthabhāvataḥ /
tataḥ puṇyatamaṃ tīrthaṃ saṃjātaṃ vasudhātale
kārttikasya tu māsasya kṛṣṇapakṣe trayodaśīm /
upoṣya vai naro bhaktyā sarvapāpaiḥ pramucyate
duḥsvapnasambhavaiḥ pāpairdurnimittasamudbhavaiḥ /
grahaśākinisambhūtair mucyate pāṇḍunandana
śakreśvaraṃ nṛpaśreṣṭha ye prapaśyanti bhaktitaḥ /
teṣāṃ janmakṛtaṃ pāpaṃ naśyate nātra saṃśayaḥ
agamyāgamane caiva avāhye caiva vāhite /
svāmimitravighāte yannaśyate nātra saṃśayaḥ
gopradānaṃ prakartavyaṃ śubhaṃ brāhmaṇapuṃgave /
dhuryaṃ vā dāpayet tasmin sarvāṅgaruciraṃ nṛpa
dātavyaṃ parayā bhaktyā svarge vāsamabhīpsatā /
etat te sarvam ākhyātaṃ śakreśvaraphalaṃ nṛpa
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0