Scripture Library

Revākhāṇḍa (revised text) · Chapter 37

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dārukatīrthamāhātmyavarṇanaṃ nāma ṣaṭtriṃśo 'dhyāyaḥ ||
RKV adhyāya 37
śrīmārkaṇḍeya uvāca:
tato gaccheta rājendra devatīrthamanuttamam /
yena devāstrayastriṃśat snātvā siddhiṃ parāṃ gatāḥ

37.2

yudhiṣṭhira uvāca:
kathaṃ tāta surāḥ sarve dānavairbalavattaraiḥ /
nirjitāstatra tīrthe ca snātvā siddhiṃ parāṃ gatāḥ

37.3

mārkaṇḍeya uvāca:
purā daityagaṇairugrairyuddhe 'tibalavattaraiḥ /
indro devagaṇaiḥ sārddhaṃ svarājyāccyāvito nṛpa

37.4

hastyaśvarathayānaughairmardayitvā varūthinīm /
vidhvastā bhejire mārgaṃ prahārair jarjarīkṛtāḥ

37.5

jambhaśumbhaiśca kūṣmāṇḍakuhakādibhiḥ /
vepamānārditāḥ sarve brahmāṇamupatasthire

37.6

praṇamya śirasā devaṃ brahmāṇaṃ parameṣṭhinam /
tadā vijñāpayāmāsurdevā vahnipurogamāḥ

37.7

paśya paśya mahābhāga dānavaiḥ śakalīkṛtāḥ /
viyojitāḥ putradāraistvāmeva śaraṇaṃ gatāḥ

37.8

paritrāyasva deveśa sarvalokapitāmaha /
nānyā gatiḥ sureśāna tvāṃ muktvā parameśvara

37.9

brahmovāca:
dānavānāṃ vighātārthaṃ narmadātaṭam āsthitāḥ /
tapaḥ kurudhvaṃ svasthāḥ stha tapo hi paramaṃ balam

37.10

nānyopāyo na vai mantro vidyate na ca me kriyā /
vinā revājalaṃ puṇyaṃ sarvapāpakṣayaṃkaram

37.11

dāridryavyādhimaraṇabandhanavyasanāni ca /
etāni caiva pāpasya phalānīti matirmama

37.12

evaṃ jñātvā tataścaiva tapaḥ kuruta duṣkaram /
tathā caiva surāḥ sarve devā hyagnipurogamāḥ

37.13

tacchrutvā vacanaṃ tathyaṃ brahmaṇaḥ parameṣṭhinaḥ /
narmadām āgatāḥ sarve devā hyagnipurogamāḥ

37.14

cerurvai tatra vipulaṃ tapaḥ siddhimavāpnuvan /
tadāprabhṛti tattīrthaṃ devatīrtham anuttamam

37.15

gīyate triṣu lokeṣu sarvapāpakṣayaṃkaram /
tatra gatvā ca yo martyo vidhinā saṃyatendriyaḥ

37.16

snānaṃ samācaredbhaktyā sa labhenmauktikaṃ phalam /
yastu bhojayate viprāṃstasmiṃstīrthe narādhipa

37.17

sa labhenmukhyaviprāṇāṃ phalaṃ sāhasrikaṃ nṛpa /
tatra devaśilā ramyā mahāpuṇyavivardhinī

37.18

saṃnyāsena mṛtā ye tu teṣāṃ syād akṣayā gatiḥ /
agnipraveśaṃ yaḥ kuryāt tasmiṃs tīrthe narādhipa

37.19

rudraloke vaset tāvad yāvad ābhūtasaṃplavam /
evaṃ snānaṃ japo homaḥ svādhyāyo devatārcanam

37.20

sukṛtaṃ duṣkṛtaṃ vā 'pi tatra tīrthe 'kṣayaṃ bhavet /
eṣa te vidhiruddiṣṭa utpattiścaiva bhārata

37.21

devatīrthasya nikhilā yathā vai śaṅkarācchrutā /
paṭhanti ye pāpaharaṃ sarvaduḥkhavimocanam

37.22

devatīrthasya caritaṃ devalokaṃ vrajanti te

Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0