રેવાખાણ્ડ (સંશોધિત પાઠ) · અધ્યાય 37

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે દારુકતીર્થમાહાત્મ્યવર્ણનં નામ ષટ્ત્રિંશો ઽધ્યાયઃ ॥
ર્ક્વ્ અધ્યાય 37
શ્રીમાર્કણ્ડેય ઉવાચ:
તતો ગચ્છેત રાજેન્દ્ર દેવતીર્થમનુત્તમમ્ ।
યેન દેવાસ્ત્રયસ્ત્રિંશત્ સ્નાત્વા સિદ્ધિં પરાં ગતાઃ

યુધિષ્ઠિર ઉવાચ:
કથં તાત સુરાઃ સર્વે દાનવૈર્બલવત્તરૈઃ ।
નિર્જિતાસ્તત્ર તીર્થે ચ સ્નાત્વા સિદ્ધિં પરાં ગતાઃ

માર્કણ્ડેય ઉવાચ:
પુરા દૈત્યગણૈરુગ્રૈર્યુદ્ધે ઽતિબલવત્તરૈઃ ।
ઇન્દ્રો દેવગણૈઃ સાર્દ્ધં સ્વરાજ્યાચ્ચ્યાવિતો નૃપ

હસ્ત્યશ્વરથયાનૌઘૈર્મર્દયિત્વા વરૂથિનીમ્ ।
વિધ્વસ્તા ભેજિરે માર્ગં પ્રહારૈર્ જર્જરીકૃતાઃ

જમ્ભશુમ્ભૈશ્ચ કૂષ્માણ્ડકુહકાદિભિઃ ।
વેપમાનાર્દિતાઃ સર્વે બ્રહ્માણમુપતસ્થિરે

પ્રણમ્ય શિરસા દેવં બ્રહ્માણં પરમેષ્ઠિનમ્ ।
તદા વિજ્ઞાપયામાસુર્દેવા વહ્નિપુરોગમાઃ

પશ્ય પશ્ય મહાભાગ દાનવૈઃ શકલીકૃતાઃ ।
વિયોજિતાઃ પુત્રદારૈસ્ત્વામેવ શરણં ગતાઃ

પરિત્રાયસ્વ દેવેશ સર્વલોકપિતામહ ।
નાન્યા ગતિઃ સુરેશાન ત્વાં મુક્ત્વા પરમેશ્વર

બ્રહ્મોવાચ:
દાનવાનાં વિઘાતાર્થં નર્મદાતટમ્ આસ્થિતાઃ ।
તપઃ કુરુધ્વં સ્વસ્થાઃ સ્થ તપો હિ પરમં બલમ્

નાન્યોપાયો ન વૈ મન્ત્રો વિદ્યતે ન ચ મે ક્રિયા ।
વિના રેવાજલં પુણ્યં સર્વપાપક્ષયંકરમ્

દારિદ્ર્યવ્યાધિમરણબન્ધનવ્યસનાનિ ચ ।
એતાનિ ચૈવ પાપસ્ય ફલાનીતિ મતિર્મમ

એવં જ્ઞાત્વા તતશ્ચૈવ તપઃ કુરુત દુષ્કરમ્ ।
તથા ચૈવ સુરાઃ સર્વે દેવા હ્યગ્નિપુરોગમાઃ

તચ્છ્રુત્વા વચનં તથ્યં બ્રહ્મણઃ પરમેષ્ઠિનઃ ।
નર્મદામ્ આગતાઃ સર્વે દેવા હ્યગ્નિપુરોગમાઃ

ચેરુર્વૈ તત્ર વિપુલં તપઃ સિદ્ધિમવાપ્નુવન્ ।
તદાપ્રભૃતિ તત્તીર્થં દેવતીર્થમ્ અનુત્તમમ્

ગીયતે ત્રિષુ લોકેષુ સર્વપાપક્ષયંકરમ્ ।
તત્ર ગત્વા ચ યો મર્ત્યો વિધિના સંયતેન્દ્રિયઃ

સ્નાનં સમાચરેદ્ભક્ત્યા સ લભેન્મૌક્તિકં ફલમ્ ।
યસ્તુ ભોજયતે વિપ્રાંસ્તસ્મિંસ્તીર્થે નરાધિપ

સ લભેન્મુખ્યવિપ્રાણાં ફલં સાહસ્રિકં નૃપ ।
તત્ર દેવશિલા રમ્યા મહાપુણ્યવિવર્ધિની

સંન્યાસેન મૃતા યે તુ તેષાં સ્યાદ્ અક્ષયા ગતિઃ ।
અગ્નિપ્રવેશં યઃ કુર્યાત્ તસ્મિંસ્ તીર્થે નરાધિપ

રુદ્રલોકે વસેત્ તાવદ્ યાવદ્ આભૂતસંપ્લવમ્ ।
એવં સ્નાનં જપો હોમઃ સ્વાધ્યાયો દેવતાર્ચનમ્

સુકૃતં દુષ્કૃતં વા ઽપિ તત્ર તીર્થે ઽક્ષયં ભવેત્ ।
એષ તે વિધિરુદ્દિષ્ટ ઉત્પત્તિશ્ચૈવ ભારત

દેવતીર્થસ્ય નિખિલા યથા વૈ શઙ્કરાચ્છ્રુતા ।
પઠન્તિ યે પાપહરં સર્વદુઃખવિમોચનમ્

દેવતીર્થસ્ય ચરિતં દેવલોકં વ્રજન્તિ તે