Revākhāṇḍa (revised text) · Chapter 32

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe brahmāvartatīrthamāhātmyavarṇanaṃ nāmaikatriṃśo 'dhyāyaḥ ||
RKV adhyāya 32
śrīmārkaṇḍeya uvāca:
pattreśvaraṃ tato gacchet sarvapāpapraṇāśanam /
yatra siddho mahābhāgaścitrasenasuto balī

yudhiṣṭhira uvāca:
ko 'sau siddhas tadā brahmaṃstasmiṃstīrthe mahātapāḥ /
putraḥ kasya tu ko heturetadicchāmi veditum

śrīmārkaṇḍeya uvāca:
citronāma mahātejā indrasya dayitaḥ purā /
tasya putro nṛpaśreṣṭha pattreśvara iti śrutaḥ

rūpavān subhagaścaiva sarvaśatrubhayaṃkaraḥ /
indrasya dayito 'tyarthaṃ jaya ityeva cāparaḥ

sa kadācit sabhāmadhye sarvadevasamāgame /
menakānṛtyagītena mohitaḥ suciraṃ kila

tiṣṭhate gatamaryādo gataprāṇa iva kṣaṇāt /
tāvatsurapatirdevaḥ śaśāpāthājitendriyam

yasmāt tvaṃ svargasaṃstho 'pi martyadharmam upeyivān /
tasmān martye ciraṃ kālaṃ kṣapayiṣyasyasaṃśayam

evam uktaḥ surendreṇa citrasenasuto yuvā /
vepamānaḥ suraśreṣṭhaḥ kṛtāñjaliruvāca ha

pattreśvara uvāca:
mayā pāpena mūḍhena ajitendriyacetasā /
prāptaṃ vai yatphalaṃ tasya prasādaṃ kartum arhasi

śakra uvāca:
narmadātaṭamāśritya dvādaśābdaṃ jitendriyaḥ /
ārādhaya śivaṃ śāntaṃ punaḥ prāpsyasi sadgatim

satyaśaucaratānāṃ ca dharmiṣṭhānāṃ jitātmanām /
loko'yaṃ pāpināṃ naiva iti śāstrasya niścayaḥ

evamukte mahārāja sahasrākṣeṇa dhīmatā /
gandharvatanayo dhīmānpraṇamyāgāttu bhūtalam

revāyā vimale toye brahmāvartasamīpataḥ /
snātvā japtvā vidhānena arcayitvā ca śaṅkaram

vāyvambupiṇyākaphalaiśca puṣpaiḥ parṇaiśca mūlāśanayāvakena /
tatāpa pañcāgnitapobhir ugraistataśca toṣaṃ samagāt sa devaḥ

pinākapāṇiṃ varadaṃ triśūlinamumāpatiṃ hyandhakanāśanaṃ ca /
candrārdhamauliṃ gajakṛttivāsasaṃ dṛṣṭvā papātāgragataṃ samīkṣya

īśvara uvāca:
varaṃ vṛṇīṣva bhadraṃ te varado 'haṃ tavānagha /
yamicchasi dadāmyadya nātra kāryā vicāraṇā

pattreśvara uvāca:
yadi tuṣṭo 'si deveśa yadi deyo varo mama /
atra tvaṃ satataṃ tīrthe mama nāmnā bhava prabho

etacchrutvā mahādevo harṣagadgadayā girā /
tathetyuktvā yayau hṛṣṭa umayā saha śaṅkaraḥ

so 'pi tattīrtham āplutya gate deve divaṃ prati /
snātvā jāpyavidhānena tarpayitvā pitḥn punaḥ

sthāpayāmāsa deveśaṃ tasmiṃs tīrthe vidhānataḥ /
pattreśvaraṃ tu vikhyātaṃ triṣu lokeṣu bhārata

indralokaṃ gataḥ śāpānmuktaḥ so 'pi nareśvara /
hṛṣṭaḥ pramudito ramyaṃ jayaśabdādimaṅgalaiḥ

eṣa te kathitaḥ praśnaḥ pṛṣṭo yo vai yudhiṣṭhira /
tatra snānena caikena sarvapāpaiḥ pramucyate

yastvarcayenmahādevaṃ tasmiṃstīrthe yudhiṣṭhira /
snātvābhyarcya pitḥn devān so 'śvamedhaphalaṃ labhet

mṛto varṣaśataṃ sāgraṃ krīḍitvā ca śive pure /
rājā vā rājatulyo vā paścānmartyeṣu jāyate

vedavedāṅgatattvajño jīvecca śaradaḥ śatam /
vyādhiśokavinirmuktaḥ punaḥ smarati tajjalam