Revākhāṇḍa (revised text) · Chapter 224
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe vāsaveśvaratīrthamāhātmyavarṇanaṃ nāma trayoviṃśatyadhikadviśatatamo 'dhyāyaḥ ||
RKV adhyāya 224
mārkaṇḍeya uvāca:
tataḥ krośāntare pārtha tīrthaṃ koṭīśvaraṃ param /
yatra snānaṃ ca dānaṃ ca japahomārcanādikam /
bhaktyā kṛtaṃ naraistatra sarvaṃ koṭiguṇaṃ bhavet
tatra devāḥ sagandharvā ṛṣayaḥ siddhacāraṇāḥ /
jaladhiṃ pratigacchanti narmadāṃ vīkṣituṃ kila
militāḥ koṭiśo rājanrevāsāgarasaṅgame /
vinodamatulaṃ dṛṣṭvā revārṇavasamāgame
snātvā śivaṃ ca saṃsthāpya pūjayitvā maheśvaram /
koṭīśvarābhidhānaṃ tu svasvabhaktyā vidhānataḥ
koṭītīrthe parāṃ siddhiṃ samprāptāḥ sarvatoṣaṇāt /
tena tatpuṇyamatulaṃ sarvatīrtheṣu cottamam
tatra tīrthe tu yatkiṃcicchubhaṃ vā yadi vāśubham /
kriyate nṛpaśārdūla sarvaṃ koṭiguṇaṃ bhavet
tatra tīrthe tu mārgasthā ye kecidṛṣisattamāḥ /
siddhāmṛtapadaṃ yānti pitṛlokaṃ tathottamam
uttare narmadātīre dakṣiṇe cāśritāśca ye /
devalokaṃ gatās tatra iti me niścitā matiḥ
bilvārkapuṣpair dhattūrakuśakāśaprasūnakaiḥ /
ṛtūdbhavaistathānyaiśca pūjayitvā maheśvaram
nānopacārair vidhivan mantrapūrvaṃ yudhiṣṭhira /
dhūpadīpārdhanaivedyaistoṣayitvā ca dhūrjaṭim
śivalokamavāpnoti yāvadindrāścaturdaśa /
pauṣakṛṣṇāṣṭamīyoge viśeṣaḥ pūjane smṛtaḥ
nityaṃ ca nṛpatiśreṣṭha caturdaśyaṣṭamīṣu ca /
śivamabhyarcya viprāṃśca bhojayed bhaktito varān
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0