રેવાખાણ્ડ (સંશોધિત પાઠ) · અધ્યાય 224

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે વાસવેશ્વરતીર્થમાહાત્મ્યવર્ણનં નામ ત્રયોવિંશત્યધિકદ્વિશતતમો ઽધ્યાયઃ ॥
ર્ક્વ્ અધ્યાય 224
માર્કણ્ડેય ઉવાચ:
તતઃ ક્રોશાન્તરે પાર્થ તીર્થં કોટીશ્વરં પરમ્ ।
યત્ર સ્નાનં ચ દાનં ચ જપહોમાર્ચનાદિકમ્ ।
ભક્ત્યા કૃતં નરૈસ્તત્ર સર્વં કોટિગુણં ભવેત્

તત્ર દેવાઃ સગન્ધર્વા ઋષયઃ સિદ્ધચારણાઃ ।
જલધિં પ્રતિગચ્છન્તિ નર્મદાં વીક્ષિતું કિલ

મિલિતાઃ કોટિશો રાજન્રેવાસાગરસઙ્ગમે ।
વિનોદમતુલં દૃષ્ટ્વા રેવાર્ણવસમાગમે

સ્નાત્વા શિવં ચ સંસ્થાપ્ય પૂજયિત્વા મહેશ્વરમ્ ।
કોટીશ્વરાભિધાનં તુ સ્વસ્વભક્ત્યા વિધાનતઃ

કોટીતીર્થે પરાં સિદ્ધિં સમ્પ્રાપ્તાઃ સર્વતોષણાત્ ।
તેન તત્પુણ્યમતુલં સર્વતીર્થેષુ ચોત્તમમ્

તત્ર તીર્થે તુ યત્કિંચિચ્છુભં વા યદિ વાશુભમ્ ।
ક્રિયતે નૃપશાર્દૂલ સર્વં કોટિગુણં ભવેત્

તત્ર તીર્થે તુ માર્ગસ્થા યે કેચિદૃષિસત્તમાઃ ।
સિદ્ધામૃતપદં યાન્તિ પિતૃલોકં તથોત્તમમ્

ઉત્તરે નર્મદાતીરે દક્ષિણે ચાશ્રિતાશ્ચ યે ।
દેવલોકં ગતાસ્ તત્ર ઇતિ મે નિશ્ચિતા મતિઃ

બિલ્વાર્કપુષ્પૈર્ ધત્તૂરકુશકાશપ્રસૂનકૈઃ ।
ઋતૂદ્ભવૈસ્તથાન્યૈશ્ચ પૂજયિત્વા મહેશ્વરમ્

નાનોપચારૈર્ વિધિવન્ મન્ત્રપૂર્વં યુધિષ્ઠિર ।
ધૂપદીપાર્ધનૈવેદ્યૈસ્તોષયિત્વા ચ ધૂર્જટિમ્

શિવલોકમવાપ્નોતિ યાવદિન્દ્રાશ્ચતુર્દશ ।
પૌષકૃષ્ણાષ્ટમીયોગે વિશેષઃ પૂજને સ્મૃતઃ

નિત્યં ચ નૃપતિશ્રેષ્ઠ ચતુર્દશ્યષ્ટમીષુ ચ ।
શિવમભ્યર્ચ્ય વિપ્રાંશ્ચ ભોજયેદ્ ભક્તિતો વરાન્