Revākhāṇḍa (revised text) · Chapter 211

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe puṅkhilatīrthamāhātmyavarṇanaṃ nāma daśottaradviśatatamo 'dhyāyaḥ ||
RKV adhyāya 211
śrīmārkaṇḍeya uvāca:
āścaryabhūtaṃ lokasya devadevena yatkṛtam /
tatte sarvaṃ pravakṣyāmi narmadātaṭavāsinām

dvijān sukṛtpaṇān devaḥ kuṣṭhī bhūtvā yayāca ha /
śrāddhakāle tu samprāpte raktagandhānulepanaḥ

sravadbudbudagātrastu makṣikākṛmisaṃvṛtaḥ /
duścarmā durmukho gandhī praskhalaṃśca pade pade

brāhmaṇāvasathaṃ gatvā skhalandvāre 'bravīd idam /
bhobho gṛhapate tvadya brāhmaṇaiḥ saha bhojanam

tvadgṛhe kartum icchāmi hyebhiḥ saha susaṃskṛtam /
tatastaṃ brahmāṇaṃ dṛṣṭvā yajamānasamanvitāḥ

sravantaṃ sarvagātreṣu dhig dhig ityevam abruvan /
nirgacchasvāśu durgandha gṛhācchīghraṃ dvijādhama

abhojyametatsarveṣāṃ darśanāt tava satkṛtam /
evameva tathetyuktvā devadevo maheśvaraḥ

jagāmākāśamamalaṃ dṛśyamāno dvijottamaiḥ /
gate cādarśanaṃ deve snātvābhyukṣya samantataḥ

bhuñjate 'sma dvijā rājanyāvat pātre pṛthakpṛthak /
yatrayatra ca paśyanti tatratatra kṛmirbahuḥ

dṛṣṭvā vismayamāpannāḥ sarve kimiti cābruvan /
tataḥ kaścid uvācedaṃ brāhmaṇo guṇavānajaḥ

yogīndraḥ śaṅkayā tatra bahuviprasamāgame /
yo 'tra pūrvaṃ samāyātaḥ sa yogī parameśvaraḥ

tasyedaṃ krīḍitaṃ manye bhartsitasya vipākajam /
phalaṃ bhavati nānyasya hyatitheḥ śāstraniścayāt

sampūjya paramātmā vai hyatithiśca viśeṣataḥ /
śrāddhakāle tu samprāptam atithiṃ yo na pūjayet

piśācā rākṣasāstasya tadvilumpantyasaṃśayam /
rūpānvitaṃ virūpaṃ vā malinaṃ malināmbaram

yogīndraṃ śvapacaṃ vāpi atithiṃ na vicārayet /
tacchrutvā vacanaṃ tasya yajamānapurogamāḥ

brāhmaṇā dvijamanveṣṭuṃ dhāvitāḥ sarvatodiśam /
tāvat kathaṃcit kenāpi gahanaṃ vanamāśritaḥ

dṛṣṭo dṛṣṭa iti proktaṃ tena te sarva āgatāḥ /
tataḥ paśyanti taṃ vipraṃ sthāṇuvanniścalaṃ sthitam

krandate na calati spandate na ca paśyati /
jalpanti karuṇaṃ kecit stuvanti ca tathāpare

vāgbhiḥ satatam iṣṭābhiḥ stūyamānastrilocanaḥ /
kṣudhārditānāṃ deveśa brāhmaṇānāṃ viśeṣataḥ /
vinaṣṭamannaṃ sarveṣāṃ punaḥ saṃkartum arhasi

śrutvā tu vacanaṃ teṣāṃ brāhmaṇānāṃ yudhiṣṭhira /
parayā kṛpayā devaḥ prasannas tān uvāca ha

mayā prasannena mahānubhāvāstadeva vo 'nnaṃ vihitaṃ sudheva /
bhuñjantu viprāḥ saha bandhubhṛtyair arcantu nityaṃ mama maṇḍalaṃ ca

tataścāyatanaṃ pārtha devadevasya śūlinaḥ /
muṇḍināmeti vikhyātaṃ sarvapāpaharaṃ śubham /
kārttikyāṃ tu viśeṣeṇa gayātīrthena tatsamam