Revākhāṇḍa (revised text) · Chapter 187
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kanakhaleśvaratīrthamāhātmyavarṇanaṃ nāma ṣaḍaśītyuttaraśatatamo 'dhyāyaḥ ||
RKV adhyāya 187
śrīmārkaṇḍeya uvāca:
jāleśvaraṃ tato gacchelliṅgamādyaṃ svayambhuvaḥ /
kālāgnirudraṃ vikhyātaṃ bhṛgukacche vyavasthitam
sarvapāpapraśamanaṃ sarvopadravanāśanam /
kṣetrapāpavināśāya kṛpayā ca samutthitam
purā kalpe 'suragaṇairākrānte bhuvanatraye /
vedoktakarmanāśe ca dharme ca vilayaṃ gate
devarṣimunisiddheṣu viśvāsaparameṣu ca /
kālāgnirudrād utpanno dhūmaḥ kālodbhavodbhavaḥ
dhūmātsamutthitaṃ liṅgaṃ bhittvā pātālasaptakam /
avaṭaṃ dakṣiṇe kṛtvā liṅgaṃ tatraiva tiṣṭhati
tatra tīrthe nṛpaśreṣṭha kuṇḍaṃ jvālāsamudbhavam /
yatra sā patitā jvālā śivasya dahataḥ puram
tatrāvaṭaṃ samudbhūtaṃ dhūmāvartas tato 'bhavat /
tasminkuṇḍe tu yaḥ snānaṃ kṛtvā vai narmadājale
kuryācchrāddhaṃ pitṛbhyo vai pūjayecca trilocanam /
kālāgnirudranāmāni sa gacchet paramāṃ gatim
yatkiṃcitkāmikaṃ karma hyābhicārikameva vā /
ripusaṃkṣayakṛdvāpi sāṃtānikamathāpi vā /
atra tīrthe kṛtaṃ sarvam acirāt sidhyate nṛpa
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0