Revākhāṇḍa (revised text) · Chapter 186

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe eraṇḍītīrthamāhātmyavarṇanaṃ nāma pañcāśītyuttaraśatatamo 'dhyāyaḥ ||
RKV adhyāya 186
śrīmārkaṇḍeya uvāca:
tato gacchenmahīpāla tīrthaṃ kanakhalottamam /
garuḍena tapastaptaṃ pūjayitvā maheśvaram

divyaṃ varṣaśataṃ yāvajjātamātreṇa bhārata /
tapojapaiḥ kṛśībhūto dṛṣṭo devena śambhunā

tatastuṣṭo mahādevo vainateyaṃ manojavam /
uvāca paramaṃ vākyaṃ vinatānandavardhanam

prasannaste mahābhāga varaṃ varaya suvrata /
durlabhaṃ triṣu lokeṣu dadāmi tava khecara

garuḍa uvāca:
icchāmi vāhanaṃ viṣṇordvijendratvaṃ sureśvara /
prasanne tvayi me sarvaṃ bhavatviti matirmama

śrīmaheśa uvāca:
durlabhaḥ prāṇināṃ tāta yo varaḥ prārthito 'nagha /
devadevasya vāhanaṃ dvijendratvaṃ sudurlabham

nārāyaṇodare sarvaṃ trailokyaṃ sacarācaram /
tvayā sa katham ūhyeta devadevo jagadguruḥ

tenaiva sthāpitaścendrastrailokye sacarācare /
kathamanyasya cendratvaṃ bhavatīti sudurlabham

tathāpi mama vākyena vāhanaṃ tvaṃ bhaviṣyasi /
śaṅkhacakragadāpāṇer vahato 'pi jagattrayam

indrastvaṃ pakṣiṇāṃ madhye bhaviṣyasi na saṃśayaḥ /
iti dattvā varaṃ tasmā antardhānaṃ gato haraḥ

tato gate mahādeve hyuruṇasyānujo nṛpa /
ārādhayāmāsa tadā cāmuṇḍāṃ muṇḍamaṇḍitām

śmaśānavāsinīṃ devīṃ bahubhūtasamanvitām /
yoginīṃ yogasaṃsiddhāṃ vasāmāṃsāsavapriyām

dhyātamātrā tu tenaiva pratyakṣā hyabhavat tadā /
jālaṃdhare ca yā siddhiḥ kaulīne uḍḍiśe pare

samagrā sā bhṛgukṣetre siddhakṣetre tu saṃsthitā /
cāmuṇḍā tatra sā devī siddhakṣetre vyavasthitā

saṃstutā ṛṣibhir devair yogakṣemārthasiddhaye /
vinatānandajananas tatra tāṃ yoginīṃ nṛpa /
bhaktyā prasādayāmāsa stotrairvaidikalaukikaiḥ

garuḍa uvāca:
oṃ yā sā kṣutkṣāmakaṇṭhā navarudhiramukhā pretapadmāsanasthā bhūtānāṃ vṛndavṛndaiḥ pitṛvananilayā krīḍate śūlahastā /
śastradhvastapravīravrajarudhiragalanmuṇḍamālottarīyā devī śrīvīramātā vimalaśaśinibhā pātu vaścarmamuṇḍā

yā sā kṣutkṣāmakaṇṭhā vikṛtabhayakarī trāsinī duṣkṛtānāṃ muñcajjvālākalāpair daśanakasamasaiḥ khādati pretamāṃsam /
yā sā dordaṇḍacaṇḍair ḍamaruraṇaraṇāṭopaṭaṃkāraghaṇṭaiḥ kalpāntotpātavātāhatapaṭupaṭahair valgate bhūtamātā /
kṣutkṣāmā śuṣkakukṣiḥ khavarataranaravaraiḥ kṣodati pretamāṃsaṃ muñcantī cāṭṭahāsaṃ ghuraghuritaravā pātu vaścarmamuṇḍā

yā sā nimnodarābhā vikṛtabhavabhayatrāsinī śūlahastā cāmuṇḍā muṇḍaghātā raṇaraṇitaraṇajhallarīnādaramyā /
trailokyaṃ trāsayanti kakahakahakahair ghorarāvair anekair nṛtyantī mātṛmadhye pitṛvananilayā pātu vaścarmamuṇḍā

yā dhatte viśvamakhilaṃ nijāṃśena mahojjvalā /
kanakaprasave līnā pātu māṃ kanakeśvarī

himādrisambhavā devī dayādarśitavigrahā /
śivapriyā śive saktā pātu māṃ kanakeśvarī

anādijagadādiryā ratnagarbhā vasupriyā /
rathāṅgapāṇinā padmā pātu māṃ kanakeśvarī

sāvitrī yā ca gāyatrī mṛḍānī vāgathendirā /
smartḥṇāṃ yā sukhaṃ datte pātu māṃ kanakeśvarī

saumyāsaumyaiḥ sadā rūpaiḥ sṛjatyavati yā jagat /
parā śaktiḥ parā buddhiḥ pātu māṃ kanakeśvarī

brahmaṇaḥ sargasamaye sṛjyaśaktiḥ parā tu yā /
jaganmāyā jagaddhātrī pātu māṃ kanakeśvarī

viśvasya pālane viṣṇoryā śaktiḥ paripālikā /
madanonmādinī mukhyā pātu māṃ kanakeśvarī

viśvasaṃlayane mukhyā yā rudreṇa samāśritā /
raudrī śaktiḥ śivānantā pātu māṃ kanakeśvarī

kailāsasānusaṃrūḍha kanakaprasaveśayā /
bhasmakābhihṛtā pūrvaṃ pātu māṃ kanakeśvarī

patiprabhāvamicchantī trasyantī yā vinā patim /
abalā tvekabhāvā ca pātu māṃ kanakeśvarī

viśvasaṃrakṣaṇe saktā rakṣitā kanakena yā /
ā brahmastambajananī pātu māṃ kanakeśvarī

brahmaviṣṇvīśvarāḥ śaktyā śarīragrahaṇaṃ yayā /
prāpitāḥ prathamā śaktiḥ pātu māṃ kanakeśvarī

śrutvā tu garuḍenoktaṃ devīvṛttacatuṣṭayam /
prasannā saṃmukhī bhūtvā vākyametad uvāca ha

śrīcāmuṇḍovāca:
prasannā te mahāsattva varaṃ varaya vāñchitam /
dadāmi te dvijaśreṣṭha yatte manasi rocate

garuḍa uvāca:
ajaraścāmaraścaiva adhṛṣyaśca surāsuraiḥ /
tava prasādāccaivānyairajeyaśca bhavāmyaham

tvayā cātra sadā devi sthātavyaṃ tīrthasannidhau /
mārkaṇḍeya uvāca:
evaṃ bhaviṣyatītyuktvā devī devairabhiṣṭutā

jagāmākāśamāviśya bhūtasaṅghasamanvitā /
yadā lakṣmyā nṛpaśreṣṭha sthāpitaṃ puramuttamam

anumānya tadā devīṃ kṛtaṃ tasyāṃ samarpitam /
lakṣmīruvāca:
rakṣaṇāya mayā devi yogakṣemārthasiddhaye

mātṛvatpratipālyaṃ te sadā devi puraṃ mama /
garuḍo 'pi tataḥ snātvā sampūjya kanakeśvarīm

tīrthaṃ tatraiva saṃsthāpya jagāmākāśamuttamam /
tatra tīrthe tu yaḥ snātvā pūjayet pitṛdevatāḥ

sarvakāmasamṛddhasya yajñasya phalamaśnute /
gandhapuṣpādibhir yastu pūjayet kanakeśvaram

tasya yogaiśvaryasiddhiryogapīṭheṣu jāyate /
mṛto yogeśvaraṃ lokaṃ jayaśabdādimaṅgalaiḥ /
sa gacchennātra sandeho yoginīgaṇasaṃyutaḥ