Revākhāṇḍa (revised text) · Chapter 179

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gaṅgāvahakatīrthamāhātmyavarṇanaṃ nāmāṣṭasaptatyuttaraśatatamo 'dhyāyaḥ ||
RKV adhyāya 179
mārkaṇḍeya uvāca:
tato gacchettu rājendra gautameśvaramuttamam /
sarvapāpaharaṃ tīrthaṃ triṣu lokeṣu viśrutam

gautamena tapastaptaṃ tatra tīrthe yudhiṣṭhira /
divyaṃ varṣasahasraṃ tu tatastuṣṭo maheśvaraḥ

praṇamya śirasā tatra sthāpitaḥ parameśvaraḥ /
sthāpito gautameneśo gautameśvara ucyate

tatra devaiśca gandharvair ṛṣibhiḥ pitṛdaivataiḥ /
samprāptā hyuttamā siddhir ārādhya parameśvaram

tatra tīrthe tu yaḥ snātvā pūjayet pitṛdevatāḥ /
pūjayet paramīśānaṃ sarvapāpaiḥ pramucyate

bahavastanna jānanti viṣṇumāyāvimohitāḥ /
tatra saṃnihitaṃ devaṃ śūlapāṇiṃ maheśvaram

brahmacārī tu yo bhūtvā tatra tīrthe nareśvara /
snātvārcayen mahādevaṃ so 'śvamedhaphalaṃ labhet

brahmacārī tu yo bhūtvā tarpayet pitṛdevatāḥ /
pūjayet paramīśānaṃ sarvapāpaiḥ pramucyate

tatra tīrthe tu yo dānaṃ bhaktyā dadyād dvijātaye /
tadakṣayaphalaṃ sarvaṃ nātra kāryā vicāraṇā

māse cāśvayuje rājan kṛṣṇapakṣe caturdaśīm /
snātvā tatra vidhānena dīpakānāṃ śataṃ dadet

pūjayitvā mahādevaṃ gandhapuṣpādibhir naraḥ /
mucyate sarvapāpebhyo mṛtaḥ śivapuraṃ vrajet

aṣṭamyāṃ ca caturdaśyāṃ kārttikyāṃ tu viśeṣataḥ /
upoṣya prayato bhūtvā ghṛtena snāpayecchivam

pañcagavyena madhunā dadhnā vā śītavāriṇā /
sa ca sarvasya yajñasya phalaṃ prāpnoti mānavaḥ

bhaktyā tu pūjayet paścāt sa labhet phalamuttamam /
bilvapatrairakhaṇḍaiśca puṣpairunmattakodbhavaiḥ

kuśāpāmārgasahitaiḥ kadambadroṇajairapi /
mallikākaravīraiśca raktapītaiḥ sitāsitaiḥ

puṣpairanyairyathālābhaṃ yo naraḥ pūjayecchivam /
nairantaryeṇa ṣaṇmāsaṃ yo 'rcayed gautameśvaram /
sarvānkāmānavāpnoti mṛtaḥ śivapuraṃ vrajet