Revākhāṇḍa (revised text) · Chapter 164
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nāgatīrthamāhātmyavarṇanaṃ nāma triṣaṣṭyuttaraśatatamo 'dhyāyaḥ ||
RKV adhyāya 164
śrīmārkaṇḍeya uvāca:
tato gacchenmahārāja sāṃvauraṃ tīrthamuttamam /
yatra saṃnihito bhānuḥ pūjyamānaḥ surāsuraiḥ
tatra ye paṅgutāṃ prāptāḥ śīrṇaghrāṇanakhā narāḥ /
dadrumaṇḍalabhinnāṅgā makṣikākṛmisaṃkulāḥ
mātāpitṛbhyāṃ rahitā bhrātṛbhāryāvivarjitāḥ /
anāthā vikalā vyaṅgā magnā ye duḥkhasāgare
teṣāṃ nātho jagadyonirnarmadātaṭamāśritaḥ /
sāṃvauranātho lokānāmārtihā duḥkhanāśanaḥ
tatra tīrthe tu yaḥ snātvā māsamekaṃ nirantaram /
pūjayed bhāskaraṃ devaṃ tasya puṇyaphalaṃ śṛṇu
yatphalaṃ cottare pārtha tathā vai pūrvasāgare /
dakṣiṇe paścime snātvā tatra tīrthe tu tat phalam
kaumāre yauvane pāpaṃ vārddhake yacca saṃcitam /
tat praṇaśyati sāṃvaure snānamātrānna saṃśayaḥ
na vyādhirnaiva dāridryaṃ na caiveṣṭaviyojanam /
saptajanmāni rājendra sāṃvauraparisevanāt
saptamyāmupavāsena taddine cāpyupoṣite /
sa tatphalamavāpnoti tatra snātvā na saṃśayaḥ
raktacandanamiśreṇa yadarghyeṇa phalaṃ smṛtam /
tatra tīrthe nṛpaśreṣṭha snātvā tatphalamāpnuyāt
narmadāsalilaṃ ramyaṃ sarvapātakanāśanam /
nirīkṣitaṃ viśeṣeṇa sāṃvaureṇa mahātmanā
te dhanyāste mahātmānas teṣāṃ janma sujīvitam /
snātvā paśyanti deveśaṃ sāṃvaureśvaramuttamam
sūryaloke vaset tāvad yāvad ābhūtasamplavam
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0