રેવાખાણ્ડ (સંશોધિત પાઠ) · અધ્યાય 164

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે નાગતીર્થમાહાત્મ્યવર્ણનં નામ ત્રિષષ્ટ્યુત્તરશતતમો ઽધ્યાયઃ ॥
ર્ક્વ્ અધ્યાય 164
શ્રીમાર્કણ્ડેય ઉવાચ:
તતો ગચ્છેન્મહારાજ સાંવૌરં તીર્થમુત્તમમ્ ।
યત્ર સંનિહિતો ભાનુઃ પૂજ્યમાનઃ સુરાસુરૈઃ

તત્ર યે પઙ્ગુતાં પ્રાપ્તાઃ શીર્ણઘ્રાણનખા નરાઃ ।
દદ્રુમણ્ડલભિન્નાઙ્ગા મક્ષિકાકૃમિસંકુલાઃ

માતાપિતૃભ્યાં રહિતા ભ્રાતૃભાર્યાવિવર્જિતાઃ ।
અનાથા વિકલા વ્યઙ્ગા મગ્ના યે દુઃખસાગરે

તેષાં નાથો જગદ્યોનિર્નર્મદાતટમાશ્રિતઃ ।
સાંવૌરનાથો લોકાનામાર્તિહા દુઃખનાશનઃ

તત્ર તીર્થે તુ યઃ સ્નાત્વા માસમેકં નિરન્તરમ્ ।
પૂજયેદ્ ભાસ્કરં દેવં તસ્ય પુણ્યફલં શૃણુ

યત્ફલં ચોત્તરે પાર્થ તથા વૈ પૂર્વસાગરે ।
દક્ષિણે પશ્ચિમે સ્નાત્વા તત્ર તીર્થે તુ તત્ ફલમ્

કૌમારે યૌવને પાપં વાર્દ્ધકે યચ્ચ સંચિતમ્ ।
તત્ પ્રણશ્યતિ સાંવૌરે સ્નાનમાત્રાન્ન સંશયઃ

ન વ્યાધિર્નૈવ દારિદ્ર્યં ન ચૈવેષ્ટવિયોજનમ્ ।
સપ્તજન્માનિ રાજેન્દ્ર સાંવૌરપરિસેવનાત્

સપ્તમ્યામુપવાસેન તદ્દિને ચાપ્યુપોષિતે ।
સ તત્ફલમવાપ્નોતિ તત્ર સ્નાત્વા ન સંશયઃ

રક્તચન્દનમિશ્રેણ યદર્ઘ્યેણ ફલં સ્મૃતમ્ ।
તત્ર તીર્થે નૃપશ્રેષ્ઠ સ્નાત્વા તત્ફલમાપ્નુયાત્

નર્મદાસલિલં રમ્યં સર્વપાતકનાશનમ્ ।
નિરીક્ષિતં વિશેષેણ સાંવૌરેણ મહાત્મના

તે ધન્યાસ્તે મહાત્માનસ્ તેષાં જન્મ સુજીવિતમ્ ।
સ્નાત્વા પશ્યન્તિ દેવેશં સાંવૌરેશ્વરમુત્તમમ્

સૂર્યલોકે વસેત્ તાવદ્ યાવદ્ આભૂતસમ્પ્લવમ્