Revākhāṇḍa (revised text) · Chapter 161
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe mokṣatīrthamāhātmyavarṇanaṃ nāma ṣaṣṭyuttaraśatatamo 'dhyāyaḥ ||
RKV adhyāya 161
śrīmārkaṇḍeya uvāca:
tato gacchenmahārāja sarpatīrthamanuttamam /
yatra siddhā mahāsarpāstapastaptvā yudhiṣṭhira
vāsukistakṣako ghoraḥ sārpa airāvatastathā /
kāliyaśca mahābhāgaḥ karkoṭakadhanaṃjayau
śaṅkhacūḍo mahātejā dhṛtarāṣṭro vṛkodaraḥ /
kuliko vāmanaścaiva teṣāṃ ye putrapautriṇaḥ
tatra tīrthe mahāpuṇye tapastaptvā suduṣkaram /
bhuñjanti vividhānbhogānkrīḍanti ca yathāsukham
tatra tīrthe tu yaḥ snātvā tarpayet pitṛdevatāḥ /
vājapeyaphalaṃ tasya purā provāca śaṅkaraḥ
snātānāṃ sarpatīrthe tu narāṇāṃ bhuvi bhārata /
sarpavṛścikajātibhyo na bhayaṃ vidyate kvacit
mṛto bhogavatīṃ gatvā pūjyamāno mahoragaiḥ /
nāgakanyāparivṛto mahābhogapatirbhavet
mārgaśīrṣasya māsasya kṛṣṇapakṣe ca yāṣṭamī /
sopavāsaḥ śucirbhūtvā liṅgaṃ sampūrayet tilaiḥ /
yathāvibhavasāreṇa gandhapuṣpaiḥ samarcayet
evaṃ vidhāya vidhivatpraṇipatya kṣamāpayet /
tasya yatphalamuddiṣṭaṃ tacchṛṇuṣva nareśvara
tilāstatra ca yatsaṃkhyāḥ patrapuṣpaphalāni ca /
tāvat svargapure rājanmodate kālamīpsitam
tataḥ svargātparibhraṣṭo jāyate vimale kule /
surūpaḥ subhagaścaiva dhanakoṭipatirbhavet
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0