રેવાખાણ્ડ (સંશોધિત પાઠ) · અધ્યાય 161

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે મોક્ષતીર્થમાહાત્મ્યવર્ણનં નામ ષષ્ટ્યુત્તરશતતમો ઽધ્યાયઃ ॥
ર્ક્વ્ અધ્યાય 161
શ્રીમાર્કણ્ડેય ઉવાચ:
તતો ગચ્છેન્મહારાજ સર્પતીર્થમનુત્તમમ્ ।
યત્ર સિદ્ધા મહાસર્પાસ્તપસ્તપ્ત્વા યુધિષ્ઠિર

વાસુકિસ્તક્ષકો ઘોરઃ સાર્પ ઐરાવતસ્તથા ।
કાલિયશ્ચ મહાભાગઃ કર્કોટકધનંજયૌ

શઙ્ખચૂડો મહાતેજા ધૃતરાષ્ટ્રો વૃકોદરઃ ।
કુલિકો વામનશ્ચૈવ તેષાં યે પુત્રપૌત્રિણઃ

તત્ર તીર્થે મહાપુણ્યે તપસ્તપ્ત્વા સુદુષ્કરમ્ ।
ભુઞ્જન્તિ વિવિધાન્ભોગાન્ક્રીડન્તિ ચ યથાસુખમ્

તત્ર તીર્થે તુ યઃ સ્નાત્વા તર્પયેત્ પિતૃદેવતાઃ ।
વાજપેયફલં તસ્ય પુરા પ્રોવાચ શઙ્કરઃ

સ્નાતાનાં સર્પતીર્થે તુ નરાણાં ભુવિ ભારત ।
સર્પવૃશ્ચિકજાતિભ્યો ન ભયં વિદ્યતે ક્વચિત્

મૃતો ભોગવતીં ગત્વા પૂજ્યમાનો મહોરગૈઃ ।
નાગકન્યાપરિવૃતો મહાભોગપતિર્ભવેત્

માર્ગશીર્ષસ્ય માસસ્ય કૃષ્ણપક્ષે ચ યાષ્ટમી ।
સોપવાસઃ શુચિર્ભૂત્વા લિઙ્ગં સમ્પૂરયેત્ તિલૈઃ ।
યથાવિભવસારેણ ગન્ધપુષ્પૈઃ સમર્ચયેત્

એવં વિધાય વિધિવત્પ્રણિપત્ય ક્ષમાપયેત્ ।
તસ્ય યત્ફલમુદ્દિષ્ટં તચ્છૃણુષ્વ નરેશ્વર

તિલાસ્તત્ર ચ યત્સંખ્યાઃ પત્રપુષ્પફલાનિ ચ ।
તાવત્ સ્વર્ગપુરે રાજન્મોદતે કાલમીપ્સિતમ્

તતઃ સ્વર્ગાત્પરિભ્રષ્ટો જાયતે વિમલે કુલે ।
સુરૂપઃ સુભગશ્ચૈવ ધનકોટિપતિર્ભવેત્