Revākhāṇḍa (revised text) · Chapter 141
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nandāhradatīrthamāhātmyavarṇanaṃ nāma catvāriṃśadadhikaśatatamo 'dhyāyaḥ ||
RKV adhyāya 141
śrīmārkaṇḍeya uvāca:
tato gacchen mahīpāla tāpeśvaramanuttamam /
yatra sā hariṇī siddhā vyādhabhītā nareśvara
jale prakṣipya gātrāṇi hyantarikṣaṃ gatā tu sā /
vyādho vismitacittastu tāṃ mṛgīmavalokya ca
vimucya saśaraṃ cāpaṃ prārebhe tapa uttamam /
divyaṃ varṣasahasraṃ tu vyādhenācaritaṃ tapaḥ
atīte tu tataḥ kāle parituṣṭo maheśvaraḥ /
varaṃ brūhi mahāvyādha yatte manasi rocate
vyādha uvāca:
yadi tuṣṭo 'si deveśa yadi deyo varo mama /
tava pārśve mahādeva vāso me pratidīyatām
īśvara uvāca:
evaṃ bhavatu te vyādha yastvayā kāṅkṣito varaḥ /
daivadevo mahādeva ityuktvāntaradhīyata /
gate cādarśanaṃ deve sthāpayitvā maheśvaram
pūjayitvā vidhānena gato vyādhastato divam /
tadāprabhṛti tattīrthaṃ triṣu lokeṣu viśrutam
vyādhānutāpasaṃjātaṃ tāpeśvaramiti śrutam /
tatra tīrthe tu yaḥ snātvā sampūjayati śaṅkaram
śivalokamavāpnoti māmuvāca maheśvaraḥ /
ye snātā narmadātoye tīrthe tāpeśvare narāḥ
tāpatrayavimuktāste nātra kāryā vicāraṇā /
aṣṭamyāṃ ca caturdaśyāṃ tṛtīyāyāṃ viśeṣataḥ
snānaṃ samācaren nityaṃ sarvapātakaśāntaye
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0