Revākhāṇḍa (revised text) · Chapter 132
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nāgeśvaratīrthamāhātmyavarṇanaṃ nāmaikatriṃśadadhikaśatatamo 'dhyāyaḥ ||
RKV adhyāya 132
śrīmārkaṇḍeya uvāca:
tato gacchettu rājendra uttare narmadātaṭe /
sarvapāpaharaṃ tīrthaṃ vārāhaṃ nāma nāmataḥ
tatra devo jagaddhātā vārāhaṃ rūpam āsthitaḥ /
sthito lokahitārthāya saṃsārārṇavatārakaḥ
tatra tīrthe tu yaḥ snātvā pūjayed dharaṇīdharam /
gandhamālyaviśeṣaiśca jayaśabdādimaṅgalaiḥ
upavāsaparo bhūtvā dvādaśyāṃ nṛpasattama /
vṛṣalāḥ pāpakarmāṇas tathaivāndhapiśācinaḥ
ālāpād gātrasaṃparkān niḥśvāsāt sahabhojanāt /
pāpaṃ saṃkramate yasmāt tasmāt tān parivarjayet
brāhmaṇān pūjayed bhaktyā yathāśaktyā yathāvidhi /
rātrau jāgaraṇaṃ kāryaṃ kathāyāṃ tatra bhārata
prabhāte vimale snātvā tatra tīrthe jagadgurum /
ye paśyanti jitakrodhāste muktāḥ sarvapātakaiḥ
yathā tu dṛṣṭvā bhujagāḥ suparṇaṃ naśyanti muktvā viṣamugratejaḥ /
naśyanti pāpāni tathaiva śīghraṃ dṛṣṭvā mukhaṃ śūkararūpiṇastu
nabhogataṃ naśyati cāndhakāraṃ dṛṣṭvā raviṃ devavaraṃ tathaiva /
naśyanti pāpāni sudustarāṇi dṛṣṭvā mukhaṃ pārtha dharādharasya
kiṃ tasya bahubhir mantrair bhaktir yasya janārdane /
namo nārāyaṇāyeti mantraḥ sarvārthasādhakaḥ
eko 'pi kṛṣṇasya kṛtaḥ praṇāmo daśāśvamedhāvabhṛthena tulyaḥ /
daśāśvamedhī punareti janma kṛṣṇapraṇāmī na punarbhavāya
dhyāyamānā mahātmāno rūpaṃ nārāyaṇaṃ hareḥ /
ye tyajanti svakaṃ dehaṃ tatra tīrthe jitendriyāḥ
te gacchantyamalaṃ sthānaṃ yatsurair api durlabham /
kṣarākṣaravinirmuktaṃ tadviṣṇoḥ paramaṃ padam
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0